Саудия Арабистонининг Риёд шаҳрида ўтказилаётган шахмат бўйича нуфузли мусобақалардан бири — Esports World Cup турнири қизғин паллага кирди. Унда иштирок этаётган ўзбекистонлик икки нафар шахматчи — Нодирбек Абдусатторов ва Жавоҳир Синдоров 30 июль, чоршанба куни плей-офф босқичига йўлланма олиш учун навбатдаги ўйинларини ўтказишди.
Абдусатторов ҳам, Синдоров ҳам гуруҳ босқичининг илк баҳсларида имкониятни бой бериб, мусобақадаги иштирокини мағлублар йўлагида давом эттиришди. Синдоров плей-офф йўлида дастлаб хитойлик Вей Йини, сўнг АҚШ вакили Ҳикару Накамурани мағлуб этиши лозим эди. Бироқ у хитойлик шахматчига қарши кечган ҳар икки баҳсда ҳам имкониятни бой бериб, мусобақани тарк этди.
Шунга қарамай, Жавоҳир Синдоров ушбу турнирдаги иштироки эвазига 50 минг доллар миқдорида пул мукофотига эга бўлди.
Нодирбек Абдусатторов эса плей-офф йўлида америкалик Фабиано Каруана билан тўқнаш келди. У илк баҳсда ғалаба қозонган бўлса, жавоб ўйинида АҚШ вакили Каруананинг қўли баланд келди. Ғолиб номи армагеддон ўйинида аниқланадиган бўлди ва унда Нодирбек зафар қучди.
Кейинги босқичда Абдусатторов полшалик Ян-Кшиштоф Дуда билан куч синашди. Улар ўртасидаги беллашувда дастлабки ўйин дуранг билан якунланган бўлса, иккинчи партияда Нодирбек рақибининг қўпол хатосидан фойдаланган ҳолда ғалабани қўлга киритди ва плей-оффнинг сўнгги йўлланмасига эга чиқди.
Шу тариқа, D гуруҳидан Магнус Карлсен биринчи ўринни эгаллаб, кейинги босқичга йўл олди. Нодирбек Абдусатторов эса иккинчи ўринни қўлга киритиб, плей-офф чиптасини қўлга киритди.
Бугун, 31 июль куни чорак финал баҳслари старт олади. Унда Абдусатторовга франциялик Алиреза Фирузжа рақиблик қилади. Ушбу жуфтлик ғолиби ярим финал йўлланмасига эга чиқади.
Изоҳ (0)