Ўзбекистонда 2025 йилнинг ҳозирги кунига қадар самолётда 5 та ўлим қайд этилган. Бу ҳақда Uzbekistan Airports матбуот хизмати хабар берди.
Маълум қилинишича, 2024 йилда 14 та ўлим ҳолати қайд этилган бўлиб, улардан 11 таси самолёт бортида, 3 таси Тошкент халқаро аэропортининг учиб келиш залида содир бўлган. 2025 йилнинг ҳозирги кунига қадар қайд этилган 5 та ўлим ҳолатининг барчаси манзилга етиб боргунга қадар самолёт бортида рўй берган.
2024 йилда Ўзбекистон аэропортларида 46 нафар йўловчи соғлиғи сабабли парвозга қўйилмаган. Жорий йилнинг олти ойида эса 61 йўловчига парвоз қилишга рухсат берилмаган.
“Нохуш ҳолатларнинг аксарияти парвоз вақтида рўй беради, шу боис йўловчилар юзага келиши мумкин бўлган хавфларни олдиндан билишлари ва ҳаво қатновига қарши кўрсатмаларни инобатга олишлари зарур”, деди Uzbekistan Airports тиббий хизматни ривожлантириш бўлими бошлиғи Севара Салихова.
Маълум қилинишича, фуқарода ўткир ёки сурункали касалликлар мавжуд бўлса, парвозлар саломатлик учун потенциал хавф туғдириши мумкин. Босимнинг ўзгариши, ҳаракатнинг чеклангани ва бошқа парвоз хусусиятлари йўловчи ҳолатини оғирлаштириши мумкин, шунинг учун баъзи тиббий кўрсатмалар билан парвоз хавфли бўлиши ва айрим ҳолларда йўловчи рейсдан олиниши мумкин.
Учишга қарши асосий тиббий кўрсатмалар:
- яқин орада ўтказилган жарроҳлик операциялари;
- ўткир юрак-қон томир касалликлари (масалан, юрак хуружи, беқарор стенокардия);
- инсульт ва бошқа ўткир неврологик ҳолатлар;
- пневмоторакс, оғир бронхиал астма, пневмония;
- тромбоэмболия, фаол қон кетиш, оғир анемия;
- қулоқ, бурун бўшлиқлари ва кўзларнинг баротравмаси;
- ҳомиладорликнинг сўнгги босқичлари, айниқса, оғир асоратлар бўлса.
Учиш мумкин бўлмаган ҳолатларнинг тўлиқ рўйхати билан қуйидаги ҳавола орқали танишиш мумкин.
Қайд этилишича, тиббий қарши кўрсатмалар бўйича қўйиладиган талаблар турли хил авиакомпанияларда бир-биридан фарқ қилиши мумкин. Баъзи ҳолларда авиаташувчи шифокор маълумотномасини талаб қилиш ҳуқуқига эга. Масалан, беқарор ташхислар, кислород билан қўллаб-қувватлаш зарурати, тиббий назорат ёки ҳомиладорликнинг сўнгги босқичларида.
Шу сабабли Uzbekistan Airports парвоз олдидан муайян авиакомпания қоидаларини ўқишни, бирор-бир касаллик бўлса, шифокорга мурожаат қилиб, маслаҳатлашишни тавсия этди.
Изоҳ (0)