Asianа Airlines авиакомпанияси самолётида йўловчи буюмини бортда тушириб юборгани сабабли учоқ ортга қайтишга мажбур бўлди. Бу ҳақда Haberlar хабар берди.
Маълум қилинишича, самолёт Истанбулдан Сеулга учаётган бўлган. У Қозоғистон ҳудуди устидан парвоз қилаётганида йўловчилардан бири повербанкини ўриндиқлар орасига тушириб юборган. Оқибатда у экипаждан ёрдам сўраган. Бироқ борткузатувчиларнинг қурилмани олишга уриниши муваффақиятсиз тугаган. Шу сабабли самолёт ярим йўлда бурилиб, Истанбулга қайтган.
Жанубий Корея фуқаро авиацияси қўмитаси авиакомпанияларга самолёт бортида портатив зарядловчи қурилмаларни ташишни қатъиян тақиқлайди. Сабаби повербанклар литий-ион батареяларга эга бўлиб, нотўғри ишлатилганда ёки зарарланганда қизиб кетиши ёки портлаши мумкин.
Шунинг учун аксарият авиакомпаниялар бундай қурилмаларни фақат қўл юки сифатида олиб киришга рухсат беради. Шунда уларни назорат қилиш осонроқ бўлади.
Жанубий Кореяда самолётдаги повербанк портлаган
Жанубий Кореянинг Бусан аэропортида 2025 йил 28 январда повербанк портлаши оқибатида самолётда ёнғин чиққан эди. Ҳодиса Аir Busan авиакомпаниясига тегишли Airbus А321 самолёти билан юз берган. Ўша пайтда бортда 170 йўловчи ва 6 нафар экипаж аъзоси бўлган. Ёнғин оқибатида 7 киши енгил жароҳат олган, йўловчилар эвакуация қилинганди. Шундан сўнг авиакомпанияларга портатив зарядловчи қурилмалардан парвоз вақтида фойдаланишни тақиқлаш бўйича тавсия берилганди.
Изоҳ (0)