Фирибгарлик учун жазолаш тартиби қайта кўриб чиқилди

Ўзбекистон Жиноят кодексининг 168 — «Фирибгарлик» моддаси қайта кўриб чиқилди. Қонунчилик палатаси томонидан 6 октябрда қабул қилиниб, 12 октябрда Сенат маъқуллаган ўзгартишларни 26 декабрь куни Президент тасдиқлади, деб хабар қилади «Газета.uz».

Янгиланган моддага мувофиқ, фирибгарлик, яъни бировнинг мулкини ёки мулк ҳуқуқини алдов ёки ишончни суиистеъмол қилиш йўли билан эгаллаб олиш энг кам ойлик иш ҳақининг 50–100 баробари миқдоридаги жарима, 2 йилга ахлоқ тузатиш ишлари, 1–3 йилга озодликни чеклаш ёки 3 йилгача озодликдан маҳрум қилиш билан жазоланади. Илгари энг кам ойлик иш ҳақининг 100 баробари миқдоридаги жарима, 1 йилгача ахлоқ тузатиш ишлари ёки 6 ойгача қамоқ кўзда тутилган эди.

А) Катта миқдордаги (модданинг янги банди), б) бир гуруҳ шахслар билан олдиндан тил бириктирган ҳолда амалга оширилган, с) компьютер техникасидан фойдаланилган ҳолда амалга оширилган фирибгарлик энг кам ойлик иш ҳақининг 100–300 баробари миқдоридаги жарима, 3 йилга ахлоқ тузатиш ишлари, 3–5 йилга озодликни чеклаш ёки 3–5 йилга озодликдан маҳрум қилиш билан жазоланади. Илгари бунинг учун энг кам ойлик иш ҳақининг 100–300 баробари миқдоридаги жарима, 2 йилгача ахлоқ тузатиш ишлари, 2–5 йилга озодликни чеклаш ёки 5 йилгача озодликдан маҳрум қилиш жазоси кўзда тутилган эди.

Агар шу жиноят а) йирик миқдорда, б) қайтадан ёки хавфли рецидивист томонидан, с) хизмат мансабини суиистеъмол қилган ҳолда (модданинг янги банди) содир этилса, энг кам ойлик иш ҳақининг 300–400 миқдоридаги жарима, 2–3 йилга ахлоқ тузатиш ишлари ёки муайян ҳуқуқдан маҳрум қилиш билан 5–8 йиллик қамоқ билан жазоланади.

А) йирик миқдорда, б) ўта хавфли рецидивист томонидан, с) уюшган гуруҳ томонидан ёки унинг манфаати йўлида содир этилса, энг кам ойлик иш ҳақининг 400–600 баробари миқдоридаги жарима ёки 8–10 йилга озодликдан маҳрум қилиш билан жазоланади. Илгари бунинг учун энг кам ойлик иш ҳақининг 300–600 баробари миқдоридаги жарима, 3 йилга ахлоқ тузатиш ишлари ёки 5–10 йилга озодликдан маҳрум қилиш кўзда тутилган эди.

Илгаригидай, етказилган моддий зарар қопланган тақдирда озодликни чеклаш ва озодликдан маҳрум қилиш шаклидаги жазо қўлланмайди.