«15 кун давомида жонли куйлай олмаслигини Озодбекнинг ўзи ҳам билади». Гулбаҳор Эрқулова Instagram’да Юлдуз Усмонова номидан чиқарилган сохта баёнотга фикр билдирди

Instagram тармоғида хонанда Юлдуз Усмонова номидан унинг мухлислари очган саҳифа Озодбек Назарбеков 2017 йилда концертлар бермаслигига муносабат билдирган. Саҳифа бу муносабатни Юлдуз Усмонованинг номидан чиқарган, бироқ, «Qalampir.uz»нинг ёзишича, Усмонованинг ўзи бу гаплардан бехабар.

Шунга қарамай, Юлдуз Усмонова номидан чиқарилган сохта баёнот юзасидан, Instagram’даги кўпчилик қатори, Ўзбекистонда хизмат кўрсатган артист Гулбаҳор Эрқулова ҳам фикр билдиришга улгурган.

«Жонли ижро, деб ваҳимага айлантирдинглар. Ўзи ҳам билади — 15 кун жонли ижрода қўшиқ айта олмайди. Майли, одамлар фонограммага ўрганган-ку, ўша қўшиқни ўзи айтган-ку. Концертда ўша даражада куйлай олмас, вазият ҳар хил... Охирги бир ҳафта 70 фоиз жонли куйлади. Жонли ижро қаҳрамонлик эмас, бизда ҳам фонограмма умуман йўқ бўлса, ҳамма нарса сувнинг юзига чиқади», деб ёзади Гулбаҳор Эрқулова.

«Qalampir.uz»нинг ёдга солишича, Гулбаҳор Эрқулова бунгача, Озодбек Назарбековдан ташқари, Зулайҳо Бойхонова, Гулсанам Мамазоитова, Райҳон Ғаниева, Зиёда Қобулова, Шаҳзода, Манзура, Муниса Ризаева каби қатор хонандаларни танқид қилган эди.

Аввалроқ 2017 йилда Озодбек Назарбеков концерт бермаслиги ҳақида хабар берилган эди. Бунга унинг кетма-кет бир неча йил давомида берилган жонли ижродаги концертлардан бироз жисмоний толиққани сабаб қилиб кўрсатилган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.