Елизавета Глинканинг турмуш ўртоғи Глеб Глинка аёли авиаҳалокат оқибатида ҳалок бўлгани ҳақидаги ахборотни тасдиқлади. Бу ҳақда «Сноб» нашри хабар бермоқда.
«Адолатли ёрдам» жамғармасининг ижрочи директори ҳисобланган ва Доктор Лиза тахаллуси билан танилган Елизавета Глинка 25 декабрь тонгида Қора денгизга қулаган Россия Мудофаа вазирлигининг Ту-154 самолёти бортида бўлган.
Елизавета Глинка ўзининг хайрия ишлари, ёрдам ташаббуслари билан танилган эди (у Доктор Лиза тахаллуси остида блог юритган, 2010 йили Россияда йил блогери деб тан олинган). 2015 йилдан бошлаб гуманитар миссиялар сафида бир неча бор Сурияда бўлган ҳамда сурияликларга дори-дармон тарқатиш ва тиббий ёрдам кўрсатиш ишларида қатнашган.Авиаҳалокатдан икки ярим ҳафта илгари, 2016 йил 8 декабрь куни Россия президенти Владимир Путин томонидан ҳуқуқ ҳимояси соҳасидаги юксак натижалари учун Россия давлат мукофоти билан тақдирланган. Тақдирлаш маросимида сўзга чиққан Глинка хоним, жумладан, шундай деган эди:
«Ортга омон қайтишимизга ҳеч қачон ишончимиз комил эмас. Чунки уруш — бу Ердаги жаҳаннамдир. Мен нима ҳақида гапираётганимни биламан» (ҳозирда мазкур видеоролик ижтимоий тармоқларнинг Россия сегментида фаол айланмоқда).
Доктор Лиза две недели назад: Мы никогда не уверены, что вернемся назад живыми. И я знаю, о чем я говорю pic.twitter.com/hLtD97HC2H
— Дмитрий Смирнов (@dimsmirnov175) December 25, 2016
Россия Мудофаа вазирлиги ахборотига кўра, самолёт бортида жами 92 киши бўлган; дастлабки маълумотларга кўра, уларнинг бари ҳалок бўлган. Самолёт Сурияга учаётган эди, йўловчиларнинг аксарияти Александров номидаги ашула ва рақс ансамбли аъзолари бўлган.
Россия Мудофаа вазирлиги маълумотига кўра, улар Суриядаги Хмеймим авиабазасидаги рус аскарлари олдида чиқиш қилиши керак бўлган; айни вақтда, ансамбл аъзоларидан бири гуруҳ Алеппо шаҳрида концерт бериши керак бўлганини маълум қилган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)