Виталий Денисов: “Файзуллаевнинг трансфери ‘ЦСКА’га ҳам, футболчининг ўзига ҳам фойдали”

Ўзбекистон терма жамоасининг собиқ футболчиси Виталий Денисов Аббосбек Файзуллаевнинг Туркия чемпионатига йўл олиши борасида изоҳ берди.

Аббосбек учун ўтган мавсум унчалик самарали бўлмади, бироқ у терма жамоа ва клуб сафида муҳим голларни киритди. Шу боис бу трансфер — ҳам “ЦСКА”, ҳам Аббоснинг ўзи учун фойдали. Янги жамоаси энг кучли лига вакили бўлмаса-да, у яхши клубга ўтяпти, — дейди Денисов “Совецкий Спорт” нашрига берган интервьюсида.

Аввалроқ 21 ёшли футболчига “Истанбул Башакшеҳир” клуби қизиқиш билдираётгани ҳақида хабарлар тарқалганди. Кейинчалик эса футболчи тиббий кўрикдан ўтолмагани борасида миш-мишлар пайдо бўлди. Бироқ “ЦСКА” клуби матбуот хизмати берган маълумотларга кўра, Файзуллаев ҳали тиббий кўрикдан ўтмаган, шу сабабли бу борадаги хабарлар ҳақиқатга мос эмас.

Футболчининг трансферидан “ЦСКА” 7,5 миллион евро атрофида даромад олиши кутилмоқда.

Эслатиб ўтамиз, Файзуллаев 2024/25 йилги мавсумда “ЦСКА” сафида 39 та ўйин ўтказиб, 3 та гол ва 8 та голли узатмани амалга оширган.