15 декабрь куни «Истиқлол» санъат саройи «Мавсум хитлари» тақдирлаш-концерт дастурига мезбонлик қилди. Унинг доирасида 2016 йил ҳисобидан қўшиқлари хитга айланган хонандалар сийланди, деб ёзди «Sayyod.com».
«Ўзбекнаво» эстрада бирлашмаси томонидан ташкил қилинган концертда узоқ кутилган танаффусдан кейин Ўзбекистон халқ артисти Юлдуз Усмонова ҳам иштирок этди.
Юлдузнинг қайтиши Озодбекнинг бетоблиги билан параллел келди
Концерт дастурида халқ артисти Озодбек Назарбековнинг иштирок этиши кутилган бўлиб, санъаткор «Жиги-жиги» қўшиғи учун тақдирланиши керак эди. Бироқ у бетоблиги сабаб «Истиқлол»га ташриф буюра олмаган. Қўшиқ клипини кўрсатиб бериши керак бўлган раққосалар концерт бошланмай турибоқ кийимларини кўтарганича «Истиқлол»ни тарк этган.Юлдуз Усмонованинг саройга қайтиши эса мухлислар томонидан ҳаяжон билан кутиб олинган. Тахминан 9 йил давомида Усмонова «Истиқлол»да қўшиқ айтмагани таъкидланган бўлиб, унинг созандалари чиқиб келганидаёқ зал томошабинлар шовқинига бурканган.
Усмонова «Қироличаман» қўшиғини куйлаб бўлганидан кейин «Истиқлол» ундан яна бир тарона талаб қилган. Бунга жавобан қўшиқчи «Бормикин» қўшиғини ҳам куйлаб ўтган. Саҳнани тарк этар чоғида эса қўли ёрдамида уни ўпиб ҳам қўйган.
Халқ артистига мукофотни футболчилик ва мураббийлик фаолияти билан машҳур Миржалол Қосимов топширган.
«Бриллиант қўл»
Шу куни мухлислар қўшиқчи Ботир Қодировнинг қўлига эътибор қаратди. У ўнг қўлининг бармоғини синдириб олган бўлиб, «Истиқлол»га гипси билан ташриф буюрганди.
Қодиров мана шу қўли билан Гулсанам Мамазоитовага мукофот топширди. «Алдама мани» таронаси учун. «Sayyod» ўз хабарида қўшиқчининг либосига алоҳида эътибор қаратиб, унинг дидига қойил қолганини яширмаган.
Бироз кейинроқ Ботир Қодировнинг «Нима бўлди?» таронаси ҳам хит даражасига чиққани эътироф этилди. Унга мукофот саҳнага гипсларсиз чиқиб келган «Shov-shuv.uz» сайти эгаси Жасур Хамроев томонидан топширилди.
Муниса Ризаева ҳам қўшиғи учун, ҳам карашмаси
«Ўзбекнаво» «Sayyod» сайти эгаси Сардор Комиловни ҳам унутиб қолдирмади. У Муниса Ризаевани «Манбоп» қўшиғи учун табриклади.
Муниса Ризаева бошқа томондан ҳам хурсанд бўлди. У Рашид Холиқовнинг «Йўқ дема» таронасига ишланган клипдаги чиқиши ва карашмаси билан ҳам овоза бўлганди. Йил тароналаридан бири сифатида мана шу қўшиқ ҳам эътибордан четда қолмади. Мукофот Ўзбекистонда хизмат кўрсатган маданият ходими Дилором Умарова томонидан берилди.
Қўшиқчи Ҳалима, жюри Ҳалима, тарона «Ҳалима»
Актриса Ҳалима Сардор Раҳимхон билан бирга куйланган дуэт таронаси учун «Наврўз» радиоси директори Миравзал Мирсодиқов томонидан тақдирланди. Қўшиқ номи «Ҳалима».
У бироздан кейин Бунёдбек Саидовни «Лўппи» таронаси учун тақдирлаши ҳам керак эди. Бироқ кийим алмаштиришда қолиб кетгани билан бутун зални кулдирди. Бунёдбек эса мукофотни дастёр қизлардан олиб қўя қолди.
Қўшиқчи Шоҳруххон ўз рафиқаси Асал Шодиева клипида суратга тушган «Дарак йўқ» қўшиғи учун эмас, балки бутунлай бошқа қиз рол ижро этган «Алдамадим»и учун соврин қабул қилиб олди. Мукофот топширишга йўлдош Муслимбек Йўлдошев бўлди.
Феруза Каримова «Дастингдан» қўшиғи учун аталган совғани хонанда Абдурашид Йўлдошевнинг қўлидан қабул қилиб олди.
Лола ва «Лолажон»
«Лолажон»и билан ном қозонган Музаффар Мирзараҳимовни саҳнага қўшиқчи Нилуфар чақирди. Музаффар эса мукофотни олиши билан ҳаяжонланиб, саҳнадан тушиб кетди. Нилуфар эса яхши тилкларини унинг ортидан айтиб қолаверди.
Лола «Хабар ол» таронаси учун эътирофни Муҳаммадисо Абдулхаировнинг қўлидан олди.
Улуғбек Раҳматуллаев «Қирмизи олма» қўшиғи учун совринни Мавлуда Асалхўжаевадан олди.
Алишер Файзни тақдирлаш учун «Ўзбекнаво»нинг ўз ходими саҳнага чиқиб қўя қолди — лицензия бўлими раҳбари Одил Абдуқаҳҳоров. Яқиндагина у раҳбарлик қиладиган бўлим Ўзбекистонда хизмат кўрсатган артист Маҳмуджон Азимовга 15 йил деганда лицензиясини қайтариб берганди.
Концерт дастурини «Диёр» гуруҳининг қўшиғи очиб берган.
Ҳасан ва Ҳусан триосининг чиқиши эса «Sayyod» томонидан танқид қилинган: «Очиғи, йигитларнинг ижоди сустроқ кўринмоқда. Динамика йўқдек. Янги ғоялар, изланиш, ижод, меҳнат ва албатта мантиққа яқинроқ ҳазиллар ўйлаб топишларини тилаймиз», — деб ёзилган хабарда.
Концертнинг кулминацион қисми Дилдора Кунузоқованинг чиқиши бўлди. Мухлислар учун нотаниш ном кўпчиликни хайрон қолдираётган бир пайтда, у қўлтиқтаёқда намоён бўлди ва ўз ижоди билан олқишли бўлди.
Изоҳ (0)