Хитойнинг «Хебей Чайна Форчун» клуби «Арсенал»дан Алексис Санчесни олиб келишга уриниб кўради. Боиси чилилик ҳужумчи Лондон клуби билан музокарани ижобий якунлай олмаяпти.
Санчес «Арсенал» сафида 2018 йилнинг ёзига қадар бўлади. Футболчи янги шартнома тузилгудек бўлса, клубидан ҳафтасига 250 минг фунт олиш ниятида. «Арсенал»нинг талаби эса бироз бошқачароқ бўлиб, клуб унга 180 мингдан кўп тўламоқчи эмас.
«Хебей Чайна Форчун» эса майдалашиб ўтирмай, Санчес учун ҳафтасига 500 минг фунт тўлашга тайёр. Бу ҳолда у дунёда энг катта маош олаётган Эсекел Лавессини ҳам ортда қолдиради. Чунки «Хебей Чайна Форчун» Лавесси учун йилига 30 миллион евро беради.
The Sun нашрига кўра, Алексис Санчеснинг трансфер нархи 46,6 миллион фунтни ташкил қилади. Хитой клуби бу пулни «Арсенал» ҳисоб рақамига ўтказишга тайёр.
Аввалроқ «Хебей Чайна Форчун» Лионель Месси учун йилига солиқларсиз нақд 100 миллион евро тўлашга тайёр эканини маълум қилганди. Мазкур клубни ўз вақтида «Реал Мадрид» ва «Манчестер Сити»да фаолият олиб борган Мануэль Пеллигрини бошқариб бормоқда.
Мутахассиснинг сўзларига кўра, Санчес «Манчестер Сити»даёқ унинг шогирдига айланиши мумкин эди. Бироқ «молиявий фейр-плей» сабаб «Сити» Санчесни қўлга кирита олмаганди.
Изоҳ (0)