Bortida 530 kishi bo‘lgan Lufthansa aviakompaniyasiga tegishli dunyodagi eng yirik yo‘lovchi samolyoti bo‘lgan Airbus A380 ning portlash xavfi tufayli Nyu-York aeroportida shoshilinch qo‘ngani haqida xabar berilgandi. O‘zbekistonlik 7 karra Olimpiada ishtirokchisi Oksana Chusovitina ham mazkur samolyot bortida bo‘lgan. Bu haqda 41 yoshli sportchi “TASS”ga ma’lum qildi.
Oksana Chusovitina uning murabbiyi Svetlana Boginskaya ishlaydigan AQShning Xyuston shahridan Germaniyaning Frankfurt-Mayn shahriga yo‘l olayotgan edi.
“Parvoz vaqtida bomba haqida xabar kelib tushdi. Biz Nyu-York ustidan uchib bo‘lgandik va birdaniga ortga qaytib, deyarli 10 daqiqa ichida qo‘ndik. Samolyot ko‘zdan kechirilib, parvoz davom etadi deb o‘ylagandik. Ammo bizni evakuatsiya qilishdi va reys bekor qilindi”, – dedi Chusovitina.
“Ertaga ertalab uchishimizni va’da qilishmoqda”, – deya qo‘shimcha qildi o‘zbekistonlik gimnastikachi.
Qayd etish joiz, Oksana Chusovitina Xyustonda bo‘lib turgan vaqtida ketma-ket 7 Olimpiadada ishtirok etgan gimnastikachi ayol sifatida Ginnesning rekordlari kitobiga kiritilgani haqidagi sertifikatni qabul qilib olgandi.
Oksana Chusovitina Olimpiadalardagi ishtirokini Barselona–1992 dan boshlagan. 41 yoshli sportchi uchun Rio–2016 o‘yinlari yettinchi Olimpiada bo‘ldi. Bunday ko‘rsatkichga dunyo sport gimnastikachilari orasida hali hech kim erisha olmagan.
Ma’lumot uchun, Chusovitina 1992-yili Barselonada o‘tkazilgan Olimpiadada oltin medalni, 2008-yilda Pekinda o‘tkazilgan o‘yinlarda kumush medalni qo‘lga kiritgan edi.
Bundan tashqari, o‘zbekistonlik gimnastikachi uch karra jahon chempioni, jahon chempionatlarining to‘rt karra kumush va to‘rt karra bronza medali sohibasi sanaladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)