Мексикада фотографнинг хатоси сабаб 15 ёшга тўлаётган қизнинг туғилган кунига миллиондан ортиқ киши таклиф этилди

Мексиканинг Сан-Луис-Потоси штатида яшовчи Кресенсио Ибарра қизи Рубининг 15 ёшга тўлиши муносабати билан ўтказиладиган тантанага уни кўраётган барчани таклиф этган видеоролик Facebook’да жойлаштирилгач бутун мамлакатга танилиб кетди. Ҳозиргача бу таклифга миллиондан ортиқ киши муносабат билдиргани маълум қилинмоқда, дея хабар беради «ТАСС».

Туғилган кун муносабати билан ўтказиладиган кечанинг довруғи бу даражада тарқалиб кетишига бундай тадбирларни суратга олишга ихтисослашган фотографнинг хатоси сабаб бўлди. У Ибарранинг буюртмаси бўйича тасвирга олинган видеони адашиб, Facebook’даги саҳифасига жойлаштирди. Лавҳа мазкур ижтимоий тармоқ фойдаланувчилари орасида тезда оммалашиб кетди, кейинчалик YouTube видеохостингида пайдо бўлиб, ҳақиқий шов-шувга сабаб бўлди.

Фотографнинг хатоси Ибарра оиласига нафақат машҳурлик ва ОАВ эътибори, балки тижорий даромад ҳам келтирмоқда. Телевидение, кийим-кечак ишлаб чиқарувчилар ва реклама агентликлари Рубига ҳамкорлик таклиф этмоқда, қизга почта орқали турли брендларнинг либослари жўнатилмоқда.

Маҳаллий ОАВ тантанага ташриф буюришни истаганлар учун йўл кўрсаткичлар чоп этмоқда. Уларда Ибарра оиласи ранчосигача қайси транспорт воситасида етиб бориш қулайроқ эканлиги батафсил тушунтирилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.