Футбол бўйича Ўзбекистон миллий терма жамоаси келаси йилнинг 12 февраль куни Арманистон терма жамоасига қарши ўртоқлик ўйинида майдонга тушади. Беллашув Туркияда бўлиб ўтиши ҳақида ЎФФ матбуот хизмати хабар берди.
Самвел Бабаян бошқарувида ЖЧ—2018 учун кураш олиб бораётган Ўзбекистон миллий терма жамоаси 9—13 февраль кунлари Туркияда йиғин ўтказади. Сурияга қарши саралаш учрашуви эса 23 март куни бўлиб ўтади.
12 февраль санаси ФИФА куни бўлмагани учун, Арманистонга қарши беллашувда Ўзбекистон миллий терма жамоаси асосини ташкил қилувчи легионер футболчилар иштирок эта олмайди. Бу борада Самвел Бабаян терманинг яқин келажакдаги захирасини мустаҳкамлаш учун алоҳида эътибор қаратилганини қайд этган. Туркияга миллий чемпионат ўйинларида ўзини кўрсатган футболчилар олиб кетилади.
ЎФФ ўртоқлик ўйини ўтказиш таклифи билан бир қатор футбол федерацияларига чиққан. Улар орасидан фақатгина Арманистон термаси ижобий жавоб қайтарган.
Изоҳ (0)