Исроиллик 80 дан ортиқ чақирилувчи танкчи бўлиб хизмат қилиш ва мамлакатнинг Иордания билан чегарадаги Арава саҳросидаги танк қўшинлари базасига жўнашдан бош тортди. Танк қисмларига юборилган 200 чақирилувчидан деярли ярми — 86 нафари хизматдан бўйин товлади, дея хабар беради «Корреспондент.net».
Армия низомига кўра, Тель а-Шомердаги тақсимлаш пунктидан базага жўнашдан бош тортганлар чақирув пунктида қамоққа жойлаштирилади. Шундан сўнг ҳам белгиланган манзилга боришдан бўйин товласа, ҳарбий судга берилади. Ҳозирда уларнинг ярми гаупвахтага ҳибсга олинди, қолган ярми 4 кундан 20 кун муддатгача армия қамоқхонасига жўнатилди.
Исроил армияси — ЦАХАЛ кадрлар бўлими зобити узоқ йиллик хизмати давомида қўшинларнинг маълум бир турида хизмат қилишдан бунчалик оммавий тарзда бош тортиш ҳолати билан биринчи марта тўқнаш келаётганини билдирди. Армиядаги манбалар кўпчилик чақирилувчилар пиёда қўшинларида хизмат қилишга тайёрлиги, аммо танк қўшинларига боришни истамаслигини маълум қилди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)