Россия президентининг матбуот котиби Дмитрий Песков Туркия раҳбари Ражаб Тоййиб Эрдўғоннинг Сурияда Башар Асад тузумини йиқитиш нияти ҳақидаги сўзлари Кремль учун янгилик бўлганини билдирди. Бу ҳақда «РБК» хабар бермоқда.
«Мазкур баёнот ўта жиддий ва биз учун чиндан ҳам янгилик бўлди. У Сурияда қуролли кучлари ягона қонуний тартибда бўлиб турган Россия давлатининг вазиятни тушуниши билан мутаносиб келмайди. Биз яқин орада турк томонидан бу борада тегишли изоҳ берилади, деб умид қиламиз», — дея таъкидлади Песков.
Туркия президенти 29 ноябрь, сешанба куни Истанбулда, Қуддусдаги мусулмонлар муаммолари бўйича симпозиумдаги чиқишида Сурияда олиб борилаётган «Фрот қалқони» операциясидан мақсад Асад ҳукуматини ағдаришдан иборат эканлигини билдирди.
«Биз Сурия ерларига даъвогарлик қилмаймиз, бироқ уни ҳақиқий эгаларига қайтармоқчимиз. Қўшинларни давлат террорини уюштирган Асаднинг мустабид тузумига чек қўйиш учун киритдик», — дея хитоб қилган Эрдўғон.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)