Колумбияда қулаган самолёт йўловчилари рўйхати эълон қилинди

Колумбия фуқаро авиацияси бошқармаси 29 ноябрга ўтар кечаси қулаган CP2933 борти йўловчилари рўйхатини эълон қилди, дея хабар бермоқда Meduza.

Самолёт футбол бўйича Жанубий Америка кубоги финал баҳсига йўл олган Бразилиянинг «Шапекоэнсе» клуби томонидан ижарага олинган эди.

Самолёт бортида 22 нафар футболчи, клубнинг 28 нафар ходими бўлган. Спортчилар билан биргаликда 22 нафар журналист ҳам Меделинга парвоз қилган.

Самолёт экипажи тўққиз кишидан иборат бўлган.

Хабар беришларича, авиаҳалокат жойидаги қидирув-қутқарув ишлари кучли ёмғир сабаб вақтинча тўхтатилган.

Лайнер Колумбиянинг Ла-Унион шаҳри яқинида қулаган, ер билан тўқнашиш оқибатида иккига бўлиниб кетган. Учувчилар қулашдан аввал электр ускуналардаги носозлик ҳақида ахборот беришга улгурган.

Дастлабки маълумотларга кўра, авиаҳалокат оқибатида камида 25 киши ҳалок бўлган. ОАВнинг қутқарувчиларга асосланиб хабар беришича, 13 киши, хусусан, уч нафар футболчи омон қолган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.