ОАВ: Обама АҚШ махсус топшириқли бўлинмаларининг терроризмга қарши кураш бўйича ваколатларини кенгайтиришга қарор қилди

Барак Обама маъмурияти Америка махсус топшириқли бўлинмаларининг террорчиликка қарши кураш соҳасидаги ваколатларини кенгайтиришга қарор қилди, деб ёзади «ТАСС». АҚШ қуролли кучлари махсус операциялар қўмондонлигига разведка ва жанговар операциялар ўтказиш учун янги идоралараро тузилмани бошқариш таклиф этилган.

«Кўп сонли» идоралардан таркиб топган ушбу тузилма ҳозирча «Counter-External Operations Task Force» («контртеррорчилик хусусиятидаги ташқи операциялар бўйича ишчи гуруҳ») деб аталмоқда. The Washington Post ёзишича, кўзланган мақсад «сўнгги 15 йилдаги тўхтовсиз низолар давомида машқ қилинган», ҳужум учун объектларни аниқлаш моделини олиб, уни «Ғарбга қарши қаратилган ҳужум ғояларига эга террорчилик тармоқларига қарши кураш олиб бориш учун» бутун дунёга тарқатишдан иборат.

Нашр сўзларига кўра, янги тузилма «Ғарбнинг анъанавий иттифоқдошлари қуролли кучларига ва хавфсизлик кучларига разведка маълумотларини, зарбалар бериш бўйича тавсияларни ва консультатив ёрдамни таклиф эта олади ёки улар билан биргаликда операциялар ўтказа олади». «Дунёнинг ҳукумати заиф ёки умуман мавжуд бўлмаган мамлакатларида АҚШ махсус топшириқли бўлинмалари бир томонлама тартибда фаолият юритиши мумкин», — дея аниқлик киритди газета.