Ҳиндистон бош вазири Нарендра Моди Инд дарёси ҳавзасидаги унинг мамлакатига тегишли учта дарёнинг суви тўлиқ ҳинд деҳқонлари томонидан ишлатилиши ва Покистонга бошқа оқиб бормаслигига ваъда берди, деб ёзади «ТАСС».
«Сатлеж, Биас ва Рави дарёлари суви Ҳиндистонга ва бизнинг деҳқонларимизга тегишли, — деди Моди. — Бу сувнинг (Покистонга оқадиган) ҳар бир томчиси тўхтатилади. Мен уни Панжоб ҳамда Жамму ва Кашмир деҳқонларига — ҳиндистонлик деҳқонларга бераман».
Бош вазир таъкидлашича, ҳукумат мақсади «ҳинд сувининг ҳар бир томчиси» Ҳиндистон фуқароларига келиб тушишига эришишдан иборат бўлган махсус ишчи гуруҳ тузади.
Инд дарёси ҳавзаси суви бўйича баҳс 1947 йил — Британия Ҳиндистони мустақилликка эришгач, диний белгисига қараб Ҳиндистон ва Покистонга ажралиб кетганидан буён давом этиб келмоқда. Ирмоқлари бўлган ушбу дарё сувини бўлиб олиш ҳақидаги келишувни икки мамлакат 1960 йилда Халқаро тикланиш ва тараққиёт банки воситачилигида имзолаган эди. Исломобод Инд дарёси, шунингдек, Ҳиндистон ҳудудидан оқиб келувчи Чиноб ва Жалом ирмоқлари устидан назоратни қўлга киритди, бироқ Ҳиндистон, келишувга кўра, уларнинг сувидан ёндош далаларни суғориш ва чегарадош туманлар фуқаролари эҳтиёжлари учун фойдаланиш ҳуқуқига эга. Нью-Дели Беас, Рави ва Сатлеж дарёлари устидан тўлиқ назоратга эга бўлди.
Шунга қарамай, Ҳиндистон ўзини Покистонга оқаётган сувларга нисбатан ўз ҳуқуқларидан тўлиқ фойдаланмаяпти деб ҳисоблайди. Ўз навбатида, Исломобод ҳиндистонликлар битим бўйича суви ўзига тегишли дарёлардан шундоқ ҳам жуда кўп фойдаланаяпти, деган фикрда, шу туфайли бу борада тез-тез хавотир билдириб туради.
Изоҳ (0)