Франциянинг «Лион» клуби ярим ҳимоячиси Матье Вальбуэна Мадриднинг «Реал» жамоаси ҳужумчиси Карим Бензема билан бир жамоада тўп суришга қарши эмаслигини маълум қилди. Бу ҳақда, Eurosport порталига таяниб, «ТASС хабар бермоқда.
Жорий йилнинг бошида Карим Бензема Матье Вальбуэнага нисбатан товламачилик иши бўйича йирик можаро марказига тушиб қолди. Суриштирув иши давомида Бензема тергов остидаги мақомга эга бўлди.
Бундан ташқари, Франция футбол федерацияси футболчини суриштирув якунигача мамлакат термасидан четлатди. Натижада «Реал» аъзоси ўз ватанида ўтказилган Евро–2016 турнирини ўтказиб юборган эди.
Бензема билан бир жамоада ўйнаш ҳақидаги саволга Вальбуэна қуйидагича жавоб берди. «Албатта, мен тайёрман. Нега энди йўқ, бу мен учун муаммо эмас. Биз майдонда бир-биримизни яхши тушунамиз», – деди «Лион» футболчиси.
Эслатиб ўтамиз, «Реал» ҳужумчиси Карим Бензема томонидан Матье Вальбуэнанинг шантаж қилиниши юзасидан суд иши давом этмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)