Пенсия жамғармаси томонидан пенсия ва нафақалар тўловига маблағ олиш учун талабномаларни электрон шаклда қабул қилиш хизмати жорий этилди

2016 йил 3 ноябрда Адлия вазирлиги томонидан ягона ижтимоий тўловни тақсимлаш, шунингдек харажатларни қоплаш бўйича суммаларнинг тўланишини ҳамда ташкилотлар томонидан пенсия, нафақа ва бошқа тўловлар учун харажатлар амалга оширилиши тартиби тўғрисидаги Низом ҳуқуқий экспертиза ва давлат рўйхатидан ўтказилди. Бу ҳақда Ўзбекистон Республикаси Молия вазирлиги ҳузуридаги бюджетдан ташқари Пенсия жамғармаси расмий сайти хабар берди.

Жорий йилнинг ноябрь ойидан бошлаб юридик шахслар пенсия ва нафақа тўловларига Пенсия жамғармасидан маблағ олиш учун талабномаларни электрон ҳужжат талабларига риоя этган ҳолда электрон шаклда тақдим этишлари мумкин. (Электрон талабномани тўлдириш тартиби – юклаб олиш)

Юридик шахслар ўзларининг ходимларига қуйидаги тўловларни амалга оширишга маблағ олиш учун талабномалар тақдим этилади: ишловчи пенсионерларга пенсия, бола туғилганлик учун нафақа, вафот муносабати билан нафақа, уй-жой коммунал хизматлари тўлови бўйича имтиёзлар ўрнига компенсация тўловлари, 16 ёшгача ногирон бола ота-онасининг бирига қўшимча дам олиш куни учун тўловлар.

Ушбу хизматдан Ўзбекистон Республикаси давлат солиқ қўмитасининг «my.soliq.uz» сайти орқали фойдаланиш мумкин.

Маълумот хизмати — (371) 239-12-46 телефон рақами орқали.