Жанубий Кореянинг мухолифатдаги партиялари президент Пак Кин Хега нисбатан импичмент имкониятини муҳокама қилди. Прокуратура 20 ноябрь, якшанба куни давлат раҳбари дугонаси Чхве Сун Силь билан боғлиқ коррупцияли можарога бевосита алоқадор бўлиши мумкинлигини маълум қилганидан сўнг мухолифатчилар шу куннинг ўзида шошилинч тўпланди. Бу ҳақда «ТАСС» хабар бермоқда.
«Мухолифат партиялар раҳбарияти Пак Кин Хега нисбатан илгари сурилган жиддий айбловлар импичмент учун асос бўлиб хизмат қилишини тасдиқлади. Улар, шунингдек, кейинчалик бу борадаги аниқ қадамларни муҳокама этиш ва президент истеъфоси учун кампанияни давом эттириш, импичмент амалга ошган тақдирда ҳокимият бўшлиғига йўл қўймаслик учун ҳаракатлар режасини тузишга келишиб олди», — дея ёзади Dong-a Ilbo нашри.
Президентни истеъфога чиқариш учун парламентнинг 300 депутатидан камида 200 нафари импичментни маъқуллаши керак. Пак Кин Хе тарафдорларининг ҳукмрон «Сэнури» партияси парламентда 120 ўринга эга.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)