Boeing ва Airbus самолётлар бортида видеоқайд тизимини жорий этишни қўллаб-қувватлади

Boeing ва Airbus самолётларни бортда юз бераётган ҳолатларни ерга онлайн тартибда узатувчи видеоқайд тизимлари билан жиҳозлаш юзасидан таклиф билан мурожаат этган Россия Давлат думаси депутати, ФХХ собиқ директори Николай Ковалёвнинг мурожаатига муносабат билдирди. Бу ҳақда TJournal хабар бермоқда. 

Икки компания ҳам масалани техник тарафдан ҳал этишга умуман олганда рози ва тайёр эканлигини таъкидлади.

Жумладан, Boeing ҳозирнинг ўзида буюртмачиларга видео ва аудиомониторингни амалга оширувчи борт тизимини ўрнатиш таклиф этилаётгани, бироқ тўпланган видеоахборотни кенг полосали алоқадаги чекловлар туфайли ердаги станцияларга жўнатиш имкониятига эга эмаслигини билдирди. Компаниянинг авиация хавфсизлиги бўйича директори Жеймс Вейсеткга кўра, Boeing бундай имкониятларни келгусида тақдим этиши мумкин бўлган келгуси авлод тизимлари устида ишлашда давом этмоқда. 

Airbus’нинг Европа, Африка ва Осиё-Тинч океани минтақаси бўйича вице-президенти Кристофер Бакли ҳам шунга яқин фикрни билдириб ўтди. Хусусан, Бакли жорий ишланмалар ва келгусидаги ғоялар юзасидан фикр алмашиш учун мутахассислар гуруҳини шакллантиришни таклиф этди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.