«Адолат» социал-демократик партиясидан Ўзбекистон Республикаси Президентлигига номзод Наримон Умаровнинг 16 ноябрь, чоршанба куни Самарқанд вилояти сайловчилари билан учрашуви бўлиб ўтди. Каттақўрғон шаҳар драма театрида онлайн видеоконференция тарзида бўлиб ўтган тадбирда 3300 нафардан зиёд сайловчи иштирок этди. Бу ҳақда «Дарё»га партия матбуот хизмати маълум қилди.
Учрашувни Булунғур тумани миллий ҳунармандчилик коллежи директори Н.Мамадиёрова олиб борди. Наримон Умаровнинг ишончли вакили, Ўзбекистон «Адолат» СДП Самарқанд вилояти кенгаши раиси вазифасини вақтинча бажарувчи М.Бобобекова сайловчиларни Президентликка номзоднинг таржимаи ҳоли билан таништирди.
Номзод сайловолди дастурининг асосий йўналишлари билан таништирар экан, унда илгари сурилган ғоялар «Адолат» социал-демократик партиясининг ижтимоий йўналтирилган бозор иқтисодиётига асосланган ҳуқуқий-демократик давлат, маънавий ва ахлоқий етук адолатли фуқаролик жамияти барпо этиш борасидаги дастурий мақсад ва вазифаларига асосланишини қайд этди. Дастурда белгиланган вазифалар бугунги замон талаб ва эҳтиёжларидан келиб чиққан ҳамда аниқ механизмларга асосланган.
Жумладан, Н.Умаров энергия сарфини иқтисод қилишни рағбатлантиришга қаратилган замонавий технологияларни кенг миқёсда жорий этиш, мавжуд муқобил энергия манбаларидан самарали фойдаланиш орқали рақобатдош энергия бозори яратилишини рағбатлантириш масалаларига эътибор қаратишини маълум қилди. Номзоднинг бугунги кунда айнан Самарқанд вилоятида 100 МВт қувватга эга қуёш фотоэлектрик станцияси бунёд этилаётгани ҳамда у фойдаланишга топширилгандан кейин ҳар йили 49 миллион куб метр табиий газни тежаш имконини бериши хусусида билдирган фикрлари сайловчилар томонидан қўллаб-қувватланди.
Н.Умаров хотин-қизларнинг ижтимоий ҳимоясини кучайтириш борасидаги ислоҳотларни босқичма-босқич давом эттириш таклифини илгари сурди. Уларнинг янада чуқур билим ва касб маҳоратига эга бўлишлари учун кенг имкониятлар яратиш, меҳнат бозорида уларга имтиёзлар бериш, давлат бошқаруви органларининг барча соҳалари ва бўғинларига жалб қилиш масалаларини учрашув иштирокчилари маъқуллади.
Президентликка номзод сайловчиларнинг саволларига жавоб қайтариб, дастурига қизиқиш билдирганликлари учун барча иштирокчиларга ташаккурини изҳор этди.
Тадбирда Олий Мажлис Қонунчилик палатаси депутати Ш.Полвонов, Самарқанд вилояти ҳудудий давлат экспертиза бошқармаси бошлиғи С.Боқиев, Самарқанд давлат чет тиллар институти ҳуқуқшуноси М.Аслиев, Каттақўрғон шаҳар 17-сон ихтисослаштирилган давлат умумтаълим мактаби ўқитувчиси Ҳ.Абдуллаева ва бошқалар номзоднинг сайловолди дастури ҳақида фикр-мулоҳазаларини билдирди.
Изоҳ (0)