Google уйдирма янгиликлар сайтлари қидирув тизими реклама имкониятларидан фойдаланишига тўсиқ қўяди: ёлғон ёки янглиш маълумотлар мавжуд саҳифаларда эълонлар берилиши чекланади. Орадан бироз ўтиб Facebook ҳам шундай баёнот билан чиқди, дея хабар беради TJournal.
Ҳозирда Google ўзининг AdSense дастури ёрдамида реклама жойлаштириш қоидаларини ўзгартириш устида ишламоқда. Уйдирма янгиликлар сайтларини реклама даромадидан маҳрум этиш ҳақидаги қарорни Facebook ҳам қўллаб-қувватлади. Ижтимоий тармоқ вакили Wall Street Journal нашрига берган интервьюсида ишончли бўлмаган янгиликлар манбалари реклама имкониятларидан четлатилгани ва бундай манбаларнинг «қора рўйхати» янгиланиб боришини маълум қилди.
Мазкур қарорлар Google ва Facebook АҚШдаги президентлик сайловидан сўнг қақшатқич танқид остида қолгани билан ҳам изоҳланмоқда. Сайловолди кампанияси чоғида Facebook ўз саҳифаларида сохта янгиликлар жойлаштирганликда айбланди.
Жумладан, ижтимоий тармоқда Fox телеканали ходимаси Ҳиллари Клинтонни қўллаб-қувватлагани учун ишдан бўшатилгани, Клинтоннинг электрон ёзишмалари бўйича текширув олиб бораётган ФҚБ агенти жонига қасд қилгани ҳақидаги ва бошқа ёлғон хабарлар пайдо бўлган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)