Google uydirma yangiliklar saytlari qidiruv tizimi reklama imkoniyatlaridan foydalanishiga to‘siq qo‘yadi: yolg‘on yoki yanglish ma’lumotlar mavjud sahifalarda e’lonlar berilishi cheklanadi. Oradan biroz o‘tib Facebook ham shunday bayonot bilan chiqdi, deya xabar beradi TJournal.
Hozirda Google o‘zining AdSense dasturi yordamida reklama joylashtirish qoidalarini o‘zgartirish ustida ishlamoqda. Uydirma yangiliklar saytlarini reklama daromadidan mahrum etish haqidagi qarorni Facebook ham qo‘llab-quvvatladi. Ijtimoiy tarmoq vakili Wall Street Journal nashriga bergan intervyusida ishonchli bo‘lmagan yangiliklar manbalari reklama imkoniyatlaridan chetlatilgani va bunday manbalarning “qora ro‘yxati” yangilanib borishini ma’lum qildi.
Mazkur qarorlar Google va Facebook AQShdagi prezidentlik saylovidan so‘ng qaqshatqich tanqid ostida qolgani bilan ham izohlanmoqda. Saylovoldi kampaniyasi chog‘ida Facebook o‘z sahifalarida soxta yangiliklar joylashtirganlikda ayblandi.
Jumladan, ijtimoiy tarmoqda Fox telekanali xodimasi Hillari Klintonni qo‘llab-quvvatlagani uchun ishdan bo‘shatilgani, Klintonning elektron yozishmalari bo‘yicha tekshiruv olib borayotgan FQB agenti joniga qasd qilgani haqidagi va boshqa yolg‘on xabarlar paydo bo‘lgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)