Россия президенти Владимир Путин Арманистон билан Кавказ минтақасида икки мамлакат қўшинларининг Бирлашган гуруҳини ташкил этиш юзасидан келишув лойиҳасини имзолашга кўрсатма берди. Бу ҳақда «Ведомости» хабар бермоқда.
Шу тариқа ҳукуматнинг тегишли таклифи қабул қилинди ва Россия мудофаа вазирлигига ташқи ишлар вазирлиги иштирокида арман томони билан музокаралар ўтказиш ҳамда уларнинг якуни бўйича Россия томонидан келишувни имзолаш топширилди.
Лойиҳага кўра, қўшинларнинг Бирлашган гуруҳи «қуролли ҳужум (тажовуз) ва томонлар хавфсизлигига бошқа таҳдидларга лозим даражада жавоб қайтариш»ни таъминлайди. Икки мамлакат мудофаа вазирликлари гуруҳни қўллаш бўйича таклифларни ишлаб чиқади ва ўзларининг Бош қўмондонларига тасдиқлатади, гуруҳ таркибини белгилайди.
Ҳужжатда томонлар Бирлашган гуруҳ таркиби учун ажратилган қўшинларини мустақил таъминлаши ва «келишув учинчи давлатларга қарши қаратилмагани» таъкидланган.
Келишув 5 йилга тузилиши ва ушбу муддат тугагач, томонлардан бири ҳамкорликни тўхтатиш истагини билдирмаса, ўз-ўзидан келгуси беш йилликларга узайтирилиши кутилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)