Евроиттифоқ дипломатияси раҳбари Федерика Могеринининг Туркиядаги вазият юзасидан баёнотлари номақбул ва Анқара учун қадр-қимматга эга эмас. Бундай фикрни Туркия ташқи ишлар вазирлиги билдирди, деб ёзади «ТАСС».
«Афсуски, Евроиттифоқ Туркиянинг терроризмга қарши кураш масалаларидаги хавотирини тушунмасликда давом этмоқда. Евроиттифоқ шуни тушуниши керакки, у фақат Туркиядаги терактларни қоралаш билан чекланиб, ушбу масалалардаги ўз мажбуриятларини бажаришдан қоча олмайди», — дейилади Туркия ТИВ баёнотида.
Вазирлик «Евроиттифоқ Туркия халқи кўз ўнгида терроризмга қарши кураш масаласида ўзига билдирилган ишончни йўқотганини айтди. Ташкилот Курдистон ишчилар партиясини очиқдан-очиқ қурол ташлашга чақирмаслиги, унинг аъзоларига бемалол кўчиб юриш учун рухсат бериб қўйгани, Туркияга қарши тарғиботга қаршилик кўрсатмаслиги айтиб ўтилди.
Аввалроқ Могерини бутун Евроиттифоқ номидан Туркиядаги сўнгги ҳодисалар, шу жумладан ўлим жазосини қайта тиклаш масаласи ва кўплаб журналистларнинг ҳибсга олиниши Евроиттифоқда ўта кучли хавотир уйғотаётганини таъкидлаган эди.
Изоҳ (0)