Ироқнинг Мосул шаҳрини ИШИД террорчилик гуруҳи жангариларидан озод этиш бўйича ҳарбий операция бошланганидан буён ўн мингга яқин бола ўз уйларини тарк этишга мажбур бўлган, дея хабар бермоқда «ТАСС» БМТ Болалар фонди (ЮНИСЕФ)га таяниб.
«Мосулни озод этиш бўйича операция бошидан бери 20 700 га яқин киши мажбуран кўчиб кетди. ЮНИСЕФ ҳисоб-китобларига кўра, уларнинг 9700 нафари шошилинч ёрдамга муҳтож болалардир», — дейилади фонд хабарида.
ЮНИСЕФ Ироқ ҳукуматига Мосулдан қочоқлар оилаларини қабул қилишда ёрдам бериб, уларни ичимлик суви ва озиқ-овқат, шу жумладан, болалар озуқалари билан таъминламоқда.
Баъзи ироқлик оилалар қочоқлар лагерига жойлашишни маъқул кўрмасдан, ўзларининг террорчилардан озод қилинган қишлоқларига қайтиб бормоқда.
Мосулни ИШИДдан озод этиш бўйича ҳарбий операция 17 октябрь куни бошланди. Унда Ироқ ҳукумат кучлари билан бир қаторда, курд ҳарбий қисмлари ва АҚШ бошчилигидаги халқаро аксилтеррорчилик коалицияси қатнашмоқда.
Изоҳ (0)