Mosuldagi operatsiya natijasida 10 mingga yaqin bola qochoqqa aylandi
Iroqning Mosul shahrini IShID terrorchilik guruhi jangarilaridan ozod etish bo‘yicha harbiy operatsiya boshlanganidan buyon o‘n mingga yaqin bola o‘z uylarini tark etishga majbur bo‘lgan, deya xabar bermoqda “TASS” BMT Bolalar fondi (YuNISEF)ga tayanib.
“Mosulni ozod etish bo‘yicha operatsiya boshidan beri 20 700 ga yaqin kishi majburan ko‘chib ketdi. YuNISEF hisob-kitoblariga ko‘ra, ularning 9700 nafari shoshilinch yordamga muhtoj bolalardir”, — deyiladi fond xabarida.
YuNISEF Iroq hukumatiga Mosuldan qochoqlar oilalarini qabul qilishda yordam berib, ularni ichimlik suvi va oziq-ovqat, shu jumladan, bolalar ozuqalari bilan ta’minlamoqda.
Ba’zi iroqlik oilalar qochoqlar lageriga joylashishni ma’qul ko‘rmasdan, o‘zlarining terrorchilardan ozod qilingan qishloqlariga qaytib bormoqda.
Mosulni IShIDdan ozod etish bo‘yicha harbiy operatsiya 17-oktabr kuni boshlandi. Unda Iroq hukumat kuchlari bilan bir qatorda, kurd harbiy qismlari va AQSh boshchiligidagi xalqaro aksilterrorchilik koalitsiyasi qatnashmoqda.
