Ўзбекистон Профессионал футбол лигаси 2016 йилги Ўзбекистон Кубоги финали бўлиб ўтадиган жой ва санани белгилади, деб хабар бермоқда ташкилот матбуот хизмати.
«Финал учрашуви 30 ноябрь куни Самарқанддаги ‘Динамо’ стадионида бўлиб ўтади. Учрашув 13:00 да бошланади», – дейилади хабарда.
2015 йилда Ўзбекистон Кубоги соҳибига айланган Қаршининг «Насаф» жамоаси 2016 йилги Кубок баҳсларининг биринчи финалчиси бўлди.
Иккинчи финалчи номи «Бунёдкор» ва «Локомотив» ўртасида 26 ноябрь куни бўлиб ўтадиган ярим финал жавоб учрашувидан сўнг маълум бўлади. Мазкур жуфтликнинг дастлабки беллашувида «Локомотив» ўз майдонида 1:0 ҳисобида ғалаба қозонган эди.
Қайд этиш жоиз, мустақил Ўзбекистон тарихидаги биринчи Кубок баҳслари финал учрашуви 1992 йили Самарқанд шаҳрида бўлиб ўтганди. Орадан 24 йил ўтиб бу шаҳар яна Ўзбекистон Кубоги финалига мезбонлик қиладиган бўлди.
Изоҳ (0)