Futbol bo‘yicha O‘zbekiston Kubogi finali 24 yildan so‘ng yana Samarqand shahrida bo‘lib o‘tadi
O‘zbekiston Professional futbol ligasi 2016-yilgi O‘zbekiston Kubogi finali bo‘lib o‘tadigan joy va sanani belgiladi, deb xabar bermoqda tashkilot matbuot xizmati.
“Final uchrashuvi 30-noyabr kuni Samarqanddagi ‘Dinamo’ stadionida bo‘lib o‘tadi. Uchrashuv 13:00 da boshlanadi”, – deyiladi xabarda.
2015-yilda O‘zbekiston Kubogi sohibiga aylangan Qarshining “Nasaf” jamoasi 2016-yilgi Kubok bahslarining birinchi finalchisi bo‘ldi.
Ikkinchi finalchi nomi “Bunyodkor” va “Lokomotiv” o‘rtasida 26-noyabr kuni bo‘lib o‘tadigan yarim final javob uchrashuvidan so‘ng ma’lum bo‘ladi. Mazkur juftlikning dastlabki bellashuvida “Lokomotiv” o‘z maydonida 1:0 hisobida g‘alaba qozongan edi.
Qayd etish joiz, mustaqil O‘zbekiston tarixidagi birinchi Kubok bahslari final uchrashuvi 1992-yili Samarqand shahrida bo‘lib o‘tgandi. Oradan 24 yil o‘tib bu shahar yana O‘zbekiston Kubogi finaliga mezbonlik qiladigan bo‘ldi.
