Парижда 29—31 октябрь кунлари киберфутбол бўйича жаҳоннинг 32 киберфутболчиси ўртасида бўлиб ўтадиган 2016 йилги жаҳон чемпионатида Ўзбекистон вакили ҳам иштирок этади. «Бунёдкор» ФК матбуот хизмати хабарига кўра, мусобақада Ўзбекистон шарафини «Бунёдкор» киберфутболчиси Муҳаммадамин Турғунбоев (Ali_Bebeto) ҳимоя қилади.
Муҳаммадамин Турғунбоев сентябрь—октябрь ойларида Тошкентда бўлиб ўтган жаҳон чемпионати саралаш баҳсларида муваффақиятли иштирок этиб, Ўзбекистон учун ажратилган ягона йўлланмани қўлга киритган эди.
Муҳаммадамин айни вақтда Парижда бўлиб турибди ва жаҳон чемпионати олдидан тайёргарликнинг сўнгги босқичини олиб бормоқда. Францияда унга Ўзбекистон Киберфутбол ассоциацияси раҳбари Азизбек Паттахов хамроҳлик қилмоқда.
Киберфутбол бўйича жаҳон чемпионатида 32 спортчи тўрт гуруҳга саккиз кишидан тақсимланган ҳолда иштирок этади. «Плей-офф» босқичига ҳар бир гуруҳдан тўрттадан (жами — 16 та) иштирокчи йўлланма олади.
Кейинги босқичда кучлилар олимпия тизимида саралаб борилади. Муҳаммадамин Турғунбоев (Ali_Bebeto) жаҳон чемпионатидаги иштирокини 29 октябрь куни англиялик Spencer “Gorilla” никли киберфутболчига қарши баҳс билан бошлайди.
Киберфутбол бўйича жаҳон чемпионатининг умумий соврин жамғармаси 15 минг АҚШ доллари бўлиб, 1-ўрин соҳиби 8 минг, 2-ўрин – 4 минг, 3-ўрин – 2 минг, 4-ўрин эгаси эса 1 минг долларни қўлга киритади.
Жаҳон чемпионати баҳсларини www.eswc.com сайти орқали онлайн кузатиб боришингиз мумкин.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)