Россия сифат тизими («Роскачество») мамлакатда сотилаётган сариёғ маҳсулотларининг ярми санитария нормалари, шунингдек, бошқа мажбурий талабларга жавоб бермаслигини маълум қилди. «РБК»нинг ёзишича, ташкилот мутахассислари бундай хулосага келишдан аввал Россия ва хорижий сариёғ савдо белгиларидан 64 тасини текшириб чиққан.
Ташкилот вакили Марта Галичеванинг маълум қилишича, фақат 18 та савдо белгиси намуналари юқори сифатли маҳсулот бўлиб чиққан, яна 10 та савдо белгиси эса барча талабларга жавоб бериши аниқланган.
14 та намунада маҳсулот таркиби қадоқда кўрсатилганидан бироз фарқли экани, 8 та ишлаб чиқарувчи эса ишлаб чиқариш жараёнида сув қўшиш йўли билан сариёғдаги ёғ миқдорини камайтиргани маълум бўлган.
Тадқиқот давомида 18 та ишлаб чиқарувчининг маҳсулоти санитария-гигиена нормаларига жавоб бермаслиги аниқланган. Хусусан, уларнинг таркибидан хавфли бактерия ва микроорганизмлар, жумладан, ичак таёқчаси чиққан.
Айни вақтда, Россиядаги «Перекрёсток», «Пятерочка», «Карусель» савдо тармоқларига эгалик қилувчи X5 Retail Group компанияси матбуот хизмати мустақил лаборатория томонидан айнан «Роскачество» текширган партия бўйича сариёғлар текшириб чиқилгани ҳақида маълумот берган.
«Текширувлар баённомасига кўра, маҳсулотлар барча талабларга жавоб беради ва бу ‘Роскачество’ томонидан ўтказилган синов натижалари ҳаққонийлигини шубҳа остига олишга асос бўла олади», — дейилади компания ахборотида.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)