Тошкентдаги «Истиқлол» санъат саройида 20—22 октябрь кунлари хонанда Шоҳжаҳон Жўраевнинг «Ким эдигу, ким бўлдик» деб номланган концерт дастури ўтказилиши режалаштирилган эди. Концертнинг биринчи кунида меҳмон бўлган журналист Феруз Муҳаммад ўз фикр-мулоҳозалари билан ўртоқлашди.
Олдиндан шуни маълум қилишимиз мумкин: жонли ижродаги уч кунлик концертнинг биринчи куни аъло ўтди.
Концерт белгиланган вақтидан 20 дақиқача кеч бошланди, Шоҳжаҳон Жўраев дастурни «Арслон наъраси» деб номли қўшиғи билан бошланди. «Недир ул», «Лолақизғалдоқ», «Дўст қадри», «Лайлимсан», «Жониман», «Гулим», «Маконинг Фарғона» каби қўшиқлар кетма-кетлиги залдаги мухлисларни ҳам ўйнатди, ҳам ўйлатди.
Концертдаги деярли ҳар бир қўшиқ юқори пардаларда куйланди. «Эй, Она», «Кўрмишам», «Гулнора», «Воҳ, ажабо», «Унутмадим унутганинг», «У кунлар бошқа эди» сингари қўшиқларнинг ҳар бирини дастурнинг безаги сифатида эътироф эца арзийди.
Концерт номи кўпчиликнинг эътиборини тортгани бор гап. Шоҳжаҳон Жўраев концертда «Ким эдигу, ким бўлдик» таронасини куйлашдан аввал, унинг яратилиш тарихини ҳам сўзлаб берди.
«Ўзбекистон бўйлаб Мустақиллигимизнинг 25 йиллигига бағишланган ‘Ким эдигу, ким бўлдик, эртага қандай юксак марраларни эгаллашимиз керак?’ мавзусидаги тарғибот тадбирларининг бирида кўрганим, аждодларимизнинг Ўзбекистоннинг мустақилликка эришиш йўлидаги машаққатли меҳнати акс этган видеоролик менга қаттиқ таъсир қилди ва ўшандаёқ қалбимда, шууримда шу қўшиқ мусиқасини яратдим», — деди хонанда.
Дастурнинг деярли тенг ярмида куйланган ушбу қўшиқни йиғилган мухлислар хонандага жўр бўлиб куйлашди.
Шоҳжаҳон ўз амакиси — Ҳалимжон Жўраев томонидан куйланган ва ўтган асрнинг 80 йилларида жуда машҳур бўлган «Чекка бир қишлоқнинг чекка уйида» номли қўшиқни ҳам куйлади. Бу билан у ўзига яраша талабгир ҳисобланган бу қўшиқнинг аслида кимга тегишли эканини эслатиб қўймоқчи бўлганини ҳам маълум қилди.
Концертдаги қизиқарли чиқишлардан бири сифатида хонанданинг «Дўндиққина» номли қўшиғига Ҳалимахон хиром айлаганини, шунингдек, «Гўзалим» номли қўшиқ учун олинган, бош ролларини Шоҳжаҳоннинг ўзи ва актриса Зарина Низомитдинова ўйнаган ва ҳали ҳеч қаерда намойиш этилмаган клип намойишини айтиб ўтиш мумкин.
Режалаштирилган барча қўшиқлар куйлаб бўлиниб, концерт ниҳоясига етгач, бир қатор томошабинлар саҳнага яқин келиб: «Жайрани айтмасанг, кетмаймиз», — деб туриб олди. Ноилож, Шоҳжаҳон Жўраев «Жайра»ни айтиб «қутилди».
Айтмоқчи, концертда саҳна безакларига кўп аҳамият берилмаган — ҳаммаси аввалдан айтилганидек: оддийгина безатилган саҳна хонанданинг ҳаракати учун қулай эди, бундан ташқари унда томошабинларнинг кўзини қамаштирадиган чироғу буғлардан ҳам фойдаланилмади.
Феруз Муҳаммад,«Дарё» учун махсус
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)