Toshkentdagi “Istiqlol” san’at saroyida 20—22-oktabr kunlari xonanda Shohjahon Jo‘rayevning “Kim edigu, kim bo‘ldik” deb nomlangan konsert dasturi o‘tkazilishi rejalashtirilgan edi. Konsertning birinchi kunida mehmon bo‘lgan jurnalist Feruz Muhammad o‘z fikr-mulohozalari bilan o‘rtoqlashdi.
Oldindan shuni ma’lum qilishimiz mumkin: jonli ijrodagi uch kunlik konsertning birinchi kuni a’lo o‘tdi.
Konsert belgilangan vaqtidan 20 daqiqacha kech boshlandi, Shohjahon Jo‘rayev dasturni “Arslon na’rasi” deb nomli qo‘shig‘i bilan boshlandi. “Nedir ul”, “Lolaqizg‘aldoq”, “Do‘st qadri”, “Laylimsan”, “Joniman”, “Gulim”, “Makoning Farg‘ona” kabi qo‘shiqlar ketma-ketligi zaldagi muxlislarni ham o‘ynatdi, ham o‘ylatdi.
Konsertdagi deyarli har bir qo‘shiq yuqori pardalarda kuylandi. “Ey, Ona”, “Ko‘rmisham”, “Gulnora”, “Voh, ajabo”, “Unutmadim unutganing”, “U kunlar boshqa edi” singari qo‘shiqlarning har birini dasturning bezagi sifatida e’tirof etsa arziydi.
Konsert nomi ko‘pchilikning e’tiborini tortgani bor gap. Shohjahon Jo‘rayev konsertda “Kim edigu, kim bo‘ldik” taronasini kuylashdan avval, uning yaratilish tarixini ham so‘zlab berdi.
“O‘zbekiston bo‘ylab Mustaqilligimizning 25 yilligiga bag‘ishlangan ‘Kim edigu, kim bo‘ldik, ertaga qanday yuksak marralarni egallashimiz kerak?’ mavzusidagi targ‘ibot tadbirlarining birida ko‘rganim, ajdodlarimizning O‘zbekistonning mustaqillikka erishish yo‘lidagi mashaqqatli mehnati aks etgan videorolik menga qattiq ta’sir qildi va o‘shandayoq qalbimda, shuurimda shu qo‘shiq musiqasini yaratdim”, — dedi xonanda.
Dasturning deyarli teng yarmida kuylangan ushbu qo‘shiqni yig‘ilgan muxlislar xonandaga jo‘r bo‘lib kuylashdi.
Shohjahon o‘z amakisi — Halimjon Jo‘rayev tomonidan kuylangan va o‘tgan asrning 80-yillarida juda mashhur bo‘lgan “Chekka bir qishloqning chekka uyida” nomli qo‘shiqni ham kuyladi. Bu bilan u o‘ziga yarasha talabgir hisoblangan bu qo‘shiqning aslida kimga tegishli ekanini eslatib qo‘ymoqchi bo‘lganini ham ma’lum qildi.
Konsertdagi qiziqarli chiqishlardan biri sifatida xonandaning “Do‘ndiqqina” nomli qo‘shig‘iga Halimaxon xirom aylaganini, shuningdek, “Go‘zalim” nomli qo‘shiq uchun olingan, bosh rollarini Shohjahonning o‘zi va aktrisa Zarina Nizomitdinova o‘ynagan va hali hech qayerda namoyish etilmagan klip namoyishini aytib o‘tish mumkin.
Rejalashtirilgan barcha qo‘shiqlar kuylab bo‘linib, konsert nihoyasiga yetgach, bir qator tomoshabinlar sahnaga yaqin kelib: “Jayrani aytmasang, ketmaymiz”, — deb turib oldi. Noiloj, Shohjahon Jo‘rayev “Jayra”ni aytib “qutildi”.
Aytmoqchi, konsertda sahna bezaklariga ko‘p ahamiyat berilmagan — hammasi avvaldan aytilganidek: oddiygina bezatilgan sahna xonandaning harakati uchun qulay edi, bundan tashqari unda tomoshabinlarning ko‘zini qamashtiradigan chirog‘u bug‘lardan ham foydalanilmadi.
Feruz Muhammad,“Daryo” uchun maxsus
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)