«Даракчи.uz» муштарийларидан бири хўжа, бек, саид каби насл-насаблар фақат ўзаро қуда бўлиши Ислом дини одатларида бор-йўқлиги ҳақида савол билан мурожаат қилди.
— Маълумки, юртимизда хўжа, бек, саид каби насл-насаблар бор. Улардаги урф-одатларга кўра, хўжалар фақат хўжалар билан, саидлар саидлар билан қариндош бўлади. Яъни, қиз олиб, қиз беради. Совчиликка борилганда ҳам биринчи хўжа ёки саидлигини сўрайди. Бошқалар билан қариндош бўлмайди. Айтишларича, улар Пайғамбаримиз (с.а.в.) саҳобаларининг авлодлари экан... Ахир ҳаммамиз Одам Ато ва Момо Ҳавонинг авлодларимиз-ку! Саволим шундан иборат: динимизда шундай урф-одатларга қандай қаралади? Саҳобаларда шунақа одат бўлганми?
Саволга Тошкент шаҳар, Шайхонтоҳур туман бош имом хатиби, «Шайх Зайниддин» жомеъ масжиди имом хатиби Одилхон қори Юнусхон ўғли жавоб берди.
— Шариатда насл-насаб билан фахрланишдан қайтарилган. Аслида, банда қалбидаги имони, қилаётган солиҳ амали, одоби муҳим. Совчиликда ҳам бу мезон асосий ўринда туриши керак. Ҳадиси шарифда қизнинг дину диёнатига эътибор беришга чақирилган. Шунда оила мустаҳкам бўлади. Саид фақат саид билан, хўжа фақат хўжа билан қуда бўлсин, деган гап йўқ. Унутмайлик, кишининг насл-насаби, бойлиги, обрў-эътибори ёки чиройи бахт келтирмайди. Саодатга элтувчи восита — инсофу диёнат, покиза қалб ва чиройли хулқдир!
Изоҳ (0)