“Darakchi.uz” mushtariylaridan biri xo‘ja, bek, said kabi nasl-nasablar faqat o‘zaro quda bo‘lishi Islom dini odatlarida bor-yo‘qligi haqida savol bilan murojaat qildi.
— Ma’lumki, yurtimizda xo‘ja, bek, said kabi nasl-nasablar bor. Ulardagi urf-odatlarga ko‘ra, xo‘jalar faqat xo‘jalar bilan, saidlar saidlar bilan qarindosh bo‘ladi. Ya’ni, qiz olib, qiz beradi. Sovchilikka borilganda ham birinchi xo‘ja yoki saidligini so‘raydi. Boshqalar bilan qarindosh bo‘lmaydi. Aytishlaricha, ular Payg‘ambarimiz (s.a.v.) sahobalarining avlodlari ekan... Axir hammamiz Odam Ato va Momo Havoning avlodlarimiz-ku! Savolim shundan iborat: dinimizda shunday urf-odatlarga qanday qaraladi? Sahobalarda shunaqa odat bo‘lganmi?
Savolga Toshkent shahar, Shayxontohur tuman bosh imom xatibi, “Shayx Zayniddin” jome’ masjidi imom xatibi Odilxon qori Yunusxon o‘g‘li javob berdi.
— Shariatda nasl-nasab bilan faxrlanishdan qaytarilgan. Aslida, banda qalbidagi imoni, qilayotgan solih amali, odobi muhim. Sovchilikda ham bu mezon asosiy o‘rinda turishi kerak. Hadisi sharifda qizning dinu diyonatiga e’tibor berishga chaqirilgan. Shunda oila mustahkam bo‘ladi. Said faqat said bilan, xo‘ja faqat xo‘ja bilan quda bo‘lsin, degan gap yo‘q. Unutmaylik, kishining nasl-nasabi, boyligi, obro‘-e’tibori yoki chiroyi baxt keltirmaydi. Saodatga eltuvchi vosita — insofu diyonat, pokiza qalb va chiroyli xulqdir!
Izoh (0)