ФИФА рейтингида 48-ўринни эгаллаган Ўзбекистон термаси МДҲда иккинчи, Осиёда тўртинчи бўлди

Халқаро футбол федерацияси (ФИФА) ташкилотга аъзо миллий терма жамоаларнинг янги рейтингини эълон қилди.

Унга кўра, Ўзбекистон миллий терма жамоаси 617 очко билан 48-ўринни эгаллади. Ушбу кўрсаткич Осиёда Эрон (837 очко, 27-ўрин), Австралия (663, 40-ўрин) ва Жанубий Кореядан (640, 44-ўрин) кейин тўртинчи, МДҲ мамлакатлари орасида Украинадан (803, 29-ўрин) кейин иккинчи бўлди.

Ўзбекистон терма жамоаси Дания, Япония, Россия, Словения, Шотландия, Жанубий Африка каби миллий термаларни ортда қолдирди.

Қайд этиш жоиз, Ўзбекистон терма жамоаси ФИФА рейтинги тарихида илк бор Россиядан ўзиб кетди.

ФИФА рейтингини 1621 очко билан ҳамон Аргентина бошқариб бормоқда. Германия (1465) ва Бразилия (1410) бир поғонадан кўтарилиб, мос равишда 2–3-ўринларни эгаллади. Кучли ўнликка тегишли равишда Бельгия, Колумбия, Чили, Франция, Португалия, Уругвай ва Испания терма жамоалари кирди.