Sleeping in Airports ихтисослашган портали жаҳоннинг энг яхши аэропортини аниқлаш мақсадида турли мамлакатлардаги саёҳатчилар ўртасида сўров ўтказди. Унинг якунига кўра, Сингапурдаги Чанги ҳаво бандаргоҳи биринчи бўлди.
Сайёҳлар дам олиш ҳудудларининг ва самолётга чиқиш олдидан кутиш ҳудудидаги ўриндиқларнинг қулайлиги, хизмат кўрсатиш даражаси, кўнгилочар ва умумий овқатланиш муассасаларининг мавжудлиги, хавфсизлик, тозалик ва бошқа жиҳатларга асосланиб овоз берган.
Саёҳатчилар Чанги аэропорти ходимлари фаолияти, ундаги бепул кинотеатр, нархлари хамёнбоп ресторан ва дўконларнинг кўплигига юқори баҳо берган. Аэропорт терминалларидан бирининг томида ҳақиқий боғ ва ҳовузлар борлиги ҳам уларни жуда қувонтириши маълум бўлган. Сўровнома қатнашчилари Сингапур аэропортини кўнгилочар боғга қиёслаган.
Сеул остонасидаги Инчхон аэропорти рейтингда иккинчи бўлди. Учликни Токидаги Ханэда аэропорти тўлдирган бўлса, Тайвандаги Таоюань аэропорти ва Мюнхендаги Франц-Йозеф Штраус номли аэропорт мос равишда тўртинчи ва бешинчи ўринларни эгаллади.
Рейтингнинг ўнлигидан, шунингдек, Япониянинг Осака шаҳри яқинидаги Кансай аэропорти, Ванкувер халқаро аэропорти, Хельсинки-Вантаа, Лэннарт Мери номидаги Таллин аэропорти ва Цюрих аэропорти ҳам киритилган.
Изоҳ (0)