Тошкент шаҳар ҳокимияти томонидан оилавий ажримлар масаласига бағишланган катта йиғилиш ўтказилди. Унда Тошкент шаҳар ҳокими Раҳмонбек Усмонов, Ўзбекистон Бош вазири ўринбосари, Республика хотин-қизлар қўмитаси раиси Эльмира Боситхонова, Олий Мажлис Сенати Фан, таълим, маданият ва спорт масалалари қўмитаси раиси Зайниддин Низомхўжаев, шаҳар Ички ишлар бош бошқармаси бошлиғи Баҳодир Қурбонов, шаҳар бош имом-хатиби Анвар қори Турсунов, Фуқаролик ишлари бўйича Тошкент шаҳар суди раиси Ҳабибулло Тўрахўжаев, шаҳар прокурори Ботир Қудратхўжаев, Тошкент шаҳридаги туманлар ҳокимлари, маҳалла фуқаролар йиғини раислари ва уларнинг маслаҳатчилари иштирок этди, деб хабар беради «Qalampir.uz».
«Qalampir.uz»га кўра, йиғилиш сўнггида шаҳар ҳокими янги қарор устида иш бошлаб юборилгани, унга кўра, Тошкент шаҳрида ажрашган ҳар бир оила ҳақида маълумотлар — оила вакилларининг исм-фамилияси бундан буён «Тошкент» телеканали ва «Тошкент оқшоми» газетасида бериб борилиши мумкинлиги ҳақида маълум қилди.
Шаҳар ҳокими, бу ташаббус тавсия этилар экан, ажрашаётган оилалар ҳақидаги маълумотларнинг телевидение орқали тарқатилиши ажримларнинг камайишига ижобий таъсир кўрсатиши мумкинлигини қайд этди, деб хабар беради сайт.
«Ажрашаётган эр-хотинларнинг исм-фамилияларини ҳозирча ҳар 15 кунда соат 23:00 да эфирга узатиладиган дастурда, ўзгариш бўлмаса, соат 21:00 да эълон қиламиз. Агар яққол натижа сезилмаса, ажрашаётган оила аъзоларининг суратини эфирга узатамиз. Бу билан биз ҳеч кимнинг ҳақ-ҳуқуқларини топтамаймиз, аксинча, очиқ маълумотларни оммага тақдим этамиз», — унинг сўзларини келтиради «Qalampir.uz».
Шунингдек, оилавий ажримларга сабабчи бўлаётганлар, хусусан, қайнота-қайноналар, келинларни оммавий муҳокамага олиб чиқиб, улар иштирокида телекўрсатувлар тайёрланиши тавсия этилгани хабар қилинмоқда.
Изоҳ (0)