Бразилиялик ҳужумчи Неймарнинг «Барселона» клуби билан янги шартнома имзолаш маросими 21 октябрь, жума куни ўтказилади. Бу ҳақда «ТАСС» хабар бермоқда.
2016 йилнинг июль ойида «Барселона» Неймар билан келишув муддатини 2021 йилгача узайтирганини расман эълон қилганди. Унинг йиллик маоши 15 миллион евро бўлиши кўзда тутилган.
Янги шартномага кўра, Неймарнинг товон пули биринчи йили 200 миллион евро, иккинчи йили 222 миллион евро, қолган уч йили эса 250 миллион еврони ташкил қилади.
17 октябрь, душанба куни «Барселона» клубининг бошқа аъзоси – аргентиналик ҳимоячи Хавьер Маскеранонинг янги шартнома имзолаши маросими бўлиб ўтди. 32 ёшли футболчининг келишув муддати 2019 йилга қадар мўлжалланган.
Маълумот учун, Неймар 2013 йили «Сантос»дан «Барселона» сафига келиш қўшилган. Шу вақтга қадар у каталонияликлар билан ЕЧЛ ғолиблиги, УЕФА Суперкубоги, икки мартадан Испания чемпионлиги ҳамда Испания Кубоги ва бир марта мамлакат Суперкубогини қўлга киритган.
Жорий мавсумда 24 ёшли ҳужумчи «Барселона»нинг 8 ўйинида майдонга тушиб, 5 та гол ва 9 та голли узатмага муаллифлик қилди.
Изоҳ (0)