Braziliyalik hujumchi Neymarning “Barselona” klubi bilan yangi shartnoma imzolash marosimi 21-oktabr, juma kuni o‘tkaziladi. Bu haqda “TASS” xabar bermoqda.
2016-yilning iyul oyida “Barselona” Neymar bilan kelishuv muddatini 2021-yilgacha uzaytirganini rasman e’lon qilgandi. Uning yillik maoshi 15 million yevro bo‘lishi ko‘zda tutilgan.
Yangi shartnomaga ko‘ra, Neymarning tovon puli birinchi yili 200 million yevro, ikkinchi yili 222 million yevro, qolgan uch yili esa 250 million yevroni tashkil qiladi.
17-oktabr, dushanba kuni “Barselona” klubining boshqa a’zosi – argentinalik himoyachi Xavyer Maskeranoning yangi shartnoma imzolashi marosimi bo‘lib o‘tdi. 32 yoshli futbolchining kelishuv muddati 2019-yilga qadar mo‘ljallangan.
Ma’lumot uchun, Neymar 2013-yili “Santos”dan “Barselona” safiga kelish qo‘shilgan. Shu vaqtga qadar u kataloniyaliklar bilan YChL g‘olibligi, UEFA Superkubogi, ikki martadan Ispaniya chempionligi hamda Ispaniya Kubogi va bir marta mamlakat Superkubogini qo‘lga kiritgan.
Joriy mavsumda 24 yoshli hujumchi “Barselona”ning 8 o‘yinida maydonga tushib, 5 ta gol va 9 ta golli uzatmaga mualliflik qildi.
Izoh (0)