БМТ коррупция бўйича айбловларга қарамасдан Ди Каприо билан ҳамкорликни тўхтатмайди

БМТ котибияти коррупцияга алоқадорлик бўйича айблов эълон қилинган америкалик актёр Леонардо Ди Каприо билан ҳамкорликни тўхтатишни режалаштирмаяпти. Бу ҳақда БМТ бош котибининг расмий вакили Стефан Дюжаррик журналистларга маълум қилди, деб ёзади «ТАСС».

У ташкилот Голливуд актёрининг иқлим ўзгаришлари оқибатлари билан курашиш бўйича ҳаракатларини олқишлашини билдирди.

«Жамоатчилик ахборотлари департаментидаги ҳамкасбларнинг маълум қилишича, Ди Каприонинг жамғармаси АҚШнинг тегишли органлари билан ҳамкорлик қилади ва биз унинг иқлим ўзгариши бўйича курашдаги хизматларини олқишлашда давом этамиз», — деди Дюжаррик.

Эслатиб ўтамиз, БМТнинг иқлим бўйича элчиси Ди Каприо 1MDB Малайзия давлат жамғармасининг қаллоблик ишларига алоқадорликда гумон қилинмоқда.