Хонанда Шоҳжаҳон Жўраев 20—22 октябрь кунлари «Истиқлол» санъат саройида жонли ижрода «Ким эдигу, ким бўлдик» деб номланган концерт дастурини тақдим этади. Журналист Феруз Муҳаммад концертолди тайёргарлик жараёнида меҳмон бўлди.
Хонанда «Истиқлол»да 2013 йил тақдим қилган «Шукрона», 2014 йилги «Дунёнинг жаннати» номли концерт дастурларидаги анъанасига содиқ ҳолда, янги концертни ҳам тўлиқ жонли ижрода ўтказади.
Янги концерт дастурида Шоҳжаҳон Жўраев 20 дан ортиқ қўшиқ куйлашни ният қилган. Куйланиши режалаштирилаётган тароналарнинг қарийб ярми мухлислар учун янгилик бўлиши кутилмоқда.
Маълум қилишларича, концертда янграйдиган аксарият янги қўшиқларнинг сўзлари Абдулла Орипов, Зоҳиджон Олов, Ўткир Хидиров каби замондош шоирлар, Огаҳий, Ҳофиз Хоразмий каби мумтоз шеърият вакилларининг қаламига мансуб.
Концертга тайёргарликнинг журналист Феруз Муҳаммад меҳмон бўлган куни Шоҳжаҳон Жўраев «Гулим», «Унутмадим унутганинг», «Лолақизғалдоқ», «Эй, она», «Недир ул», «У кунлар бошқа эди» каби янги қўшиқлари устида иш олиб бораётган эди.
Хонанда маъмури Шуҳрат Усмоновнинг алоҳида такидлашича, уч кунлик концертда асосий эътибор саҳна безаклари, раққосалар гуруҳи, қизиқчи ва бошловчиларнинг чиқишларига эмас, балки фақат ва фақат жонли ижродаги куй ва қўшиқларга қаратилади.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)