12 октябрь, чоршанба кунги савдолар чоғида кўтарилган нефть нархи доллар курси ошиши ва нефть қазиб олиш ҳажмини чеклаш ҳақидаги ОПЕК келишуви самарадорлиги юзасидан шубҳалар фонида пасайишга ўтди, деб ёзади «Интерфакс».
Лондоннинг ICE Futures биржасида Brent нефтининг декабрдаги фьючерслари Тошкент вақти билан 19:30 га келиб, 0,33 долларга (0,63%) — баррелига 52,08 долларгача пасайди.
WTI нефтининг ноябрдаги фьючерслари эса Нью-Йорк товар биржасида бу вақтга келиб 0,40 долларга (0,79%) арзонлашиб, баррелига 50,39 долларни ташкил қилди.
Шу кунларда Истанбулда Бутунжаҳон энергетика конгресси бўлиб ўтмоқда, унда, хусусан, ОПЕК мамлакатлари Россия билан нефть ишлаб чиқаришни чеклаш борасида музокаралар олиб бормоқда. Картель бош котиби Муҳаммад Баркиндо сўзларига кўра, музокаралар конструктив тарзда ўтмоқда, битимни тайёрлаш бўйича асосий ишлар якунланиб бўлган.
Аммо баъзи экспертлар Нигерия, Ливия ва Эрон каби мамлакатлар нефть қазиб чиқаришни чеклашдан озод этилишини, чунки у ерда нефть ишлаб чиқариш санкциялар ва жанговар ҳаракатлар туфайли кескин тушиб кетганини таъкидламоқда.
Изоҳ (0)