12-oktabr, chorshanba kungi savdolar chog‘ida ko‘tarilgan neft narxi dollar kursi oshishi va neft qazib olish hajmini cheklash haqidagi OPEK kelishuvi samaradorligi yuzasidan shubhalar fonida pasayishga o‘tdi, deb yozadi “Interfaks”.
Londonning ICE Futures birjasida Brent neftining dekabrdagi fyucherslari Toshkent vaqti bilan 19:30 ga kelib, 0,33 dollarga (0,63%) — barreliga 52,08 dollargacha pasaydi.
WTI neftining noyabrdagi fyucherslari esa Nyu-York tovar birjasida bu vaqtga kelib 0,40 dollarga (0,79%) arzonlashib, barreliga 50,39 dollarni tashkil qildi.
Shu kunlarda Istanbulda Butunjahon energetika kongressi bo‘lib o‘tmoqda, unda, xususan, OPEK mamlakatlari Rossiya bilan neft ishlab chiqarishni cheklash borasida muzokaralar olib bormoqda. Kartel bosh kotibi Muhammad Barkindo so‘zlariga ko‘ra, muzokaralar konstruktiv tarzda o‘tmoqda, bitimni tayyorlash bo‘yicha asosiy ishlar yakunlanib bo‘lgan.
Ammo ba’zi ekspertlar Nigeriya, Liviya va Eron kabi mamlakatlar neft qazib chiqarishni cheklashdan ozod etilishini, chunki u yerda neft ishlab chiqarish sanksiyalar va jangovar harakatlar tufayli keskin tushib ketganini ta’kidlamoqda.
Izoh (0)