«Пойтахт» бизнес марказида Тошкент зилзиласи ва Ўзбекистон Республикаси Фанлар Академияси сейсмология институти ташкил топганининг 50 йиллигига бағишланган «Замонавий сейсмологиянинг долзарб муаммолари — TASECO 2016» халқаро конференция ўз ишини бошлади. Бу ҳақда Ўзбекистондаги БМТ Тараққиёт Дастури хабар бермоқда.
Тадбир Фанлар Академияси, сейсмология институти, Фавқулодда вазиятлар вазирлиги, Ўзбекистондаги БМТ Тараққиёт Дастури ва фалокатларга тайёргарлик бўйича Дастур кўмагида ташкил этилди.
Конференцияда дунёнинг 20 мамлакатидан келган мутахассислар маърузалар ва тақдимотлари билан қатнашади. Сейсмик хавфни баҳолашнинг охирги натижалари, зилзилани башорат этиш муаммолари, сейсмик хатарни пасайтириш масалалари ва сейсмологиянинг бошқа қатор муҳим муаммолари муҳокама қилинади, тажриба алмашинади.
Мутахассислар хорижий ҳамкасблар билан учрашув чоғида дунёда, Марказий Осиё минтақаси ва Ўзбекистон ҳудудида сейсмик ҳолатни янада кенгроқ ўрганиш ва таҳлил қилишни талаб қилувчи сейсмологиянинг замонавий босқичдаги энг долзарб муаммоларини кўриб чиқишни режалаштирмоқда.
Маълумот учун, Ўзбекистонда сейсмологик мониторингнинг замонавий тармоғи 60 дан ортиқ кузатув пунктлари, жумладан, 45 та рақамли сейсмик станция ва зилзила геофизик, гидрогеокимёвий ва геодинамик даракчилари комплексини мониторинг қилишнинг 15 та бирлашган марказларидан ташкил топган.
Изоҳ (0)