Ўзбекистон Президенти вазифасини бажарувчи Шавкат Мирзиёев 11 октябрь куни Сурхондарё вилоятига уюштирилган сафар чоғида Афғонистон билан ҳар томонлама ҳамкорликни мустаҳкамлаш зарурлигини таъкидлаб ўтди. Унинг чиқишидан парча «Ўзбекистон» телеканалининг «Ахборот» дастури орқали кўрсатилди, деб хабар беради «Газета.uz».
«Қўшни Афғонистон президенти (Ашраф Ғани) қийин кунларда биз билан бўлиб, халқимизга ва Президентимизга ҳурмат кўрсатди. Яқинда ташқи ишлар вазири (Абдулазиз Камилов) у билан Брюсселда учрашди ва ҳамкорлик масалаларини муҳокама қилди. Умид қиламизки, тез орада Ташқи ишлар вазирлиги вакиллари Афғонистонда бўлади, ва у ерда ҳамкорликни ривожлантиришга қаратилган йирик шартномалар имзоланади. Биз Афғонистоннинг меҳнатсевар халқи билан муносабатларни ҳар томонлама ривожлантиришга ҳаракат қилишимиз, тинчлик ва хотиржамликни сақлаб қолиш учун ҳамма нарсани қилишимиз керак», — деди Шавкат Мирзиёев.
Президент вазифасини бажарувчи «Термиз карго центр» божхона терминалида бўлди. Афғонистон билан ҳамкорликни ривожлантириш учун қурилган халқаро логистика маркази 300 катта юк машиналарига мўлжалланган автотураргоҳни, контейнерлар ва бошқа юклар учун омборхонани ўз ичига олади. Марказга темир йўл олиб келинган, қулай меҳмонхона ишлаб турибди. Президент вазифасини бажарувчи логистика маркази Афғонистон билан савдони йўлга қўйишга ҳамда нафақат Сурхондарё, балки бутун Ўзбекистоннинг экспорт салоҳиятини ривожлантиришга хизмат қилишига ишонч билдирди.
«Бугунги дунёнинг асосий муаммоларидан бири — бозорлар топиш. Ҳар бир мамлакат ўз маҳсулотини чет элда оммалаштириш учун ҳаракат қилади», — таъкидлади Шавкат Мирзиёев.
У шу каби йирик марказлар мамлакатнинг бошқа вилоятларидаги чегара минтақаларида қурилиши лозимлигини қўшимча тарзда айтиб ўтди.
Сафар давомида Шавкат Мирзиёев Ўзбекистоннинг жанубий сарҳадларидаги чегара постларидан бирини кўздан кечирди.
Изоҳ (0)