O‘zbekiston Prezidenti vazifasini bajaruvchi Shavkat Mirziyoyev 11-oktabr kuni Surxondaryo viloyatiga uyushtirilgan safar chog‘ida Afg‘oniston bilan har tomonlama hamkorlikni mustahkamlash zarurligini ta’kidlab o‘tdi. Uning chiqishidan parcha “O‘zbekiston” telekanalining “Axborot” dasturi orqali ko‘rsatildi, deb xabar beradi “Gazeta.uz”.
“Qo‘shni Afg‘oniston prezidenti (Ashraf G‘ani) qiyin kunlarda biz bilan bo‘lib, xalqimizga va Prezidentimizga hurmat ko‘rsatdi. Yaqinda tashqi ishlar vaziri (Abdulaziz Kamilov) u bilan Bryusselda uchrashdi va hamkorlik masalalarini muhokama qildi. Umid qilamizki, tez orada Tashqi ishlar vazirligi vakillari Afg‘onistonda bo‘ladi, va u yerda hamkorlikni rivojlantirishga qaratilgan yirik shartnomalar imzolanadi. Biz Afg‘onistonning mehnatsevar xalqi bilan munosabatlarni har tomonlama rivojlantirishga harakat qilishimiz, tinchlik va xotirjamlikni saqlab qolish uchun hamma narsani qilishimiz kerak”, — dedi Shavkat Mirziyoyev.
Prezident vazifasini bajaruvchi “Termiz kargo sentr” bojxona terminalida bo‘ldi. Afg‘oniston bilan hamkorlikni rivojlantirish uchun qurilgan xalqaro logistika markazi 300 katta yuk mashinalariga mo‘ljallangan avtoturargohni, konteynerlar va boshqa yuklar uchun omborxonani o‘z ichiga oladi. Markazga temir yo‘l olib kelingan, qulay mehmonxona ishlab turibdi. Prezident vazifasini bajaruvchi logistika markazi Afg‘oniston bilan savdoni yo‘lga qo‘yishga hamda nafaqat Surxondaryo, balki butun O‘zbekistonning eksport salohiyatini rivojlantirishga xizmat qilishiga ishonch bildirdi.
“Bugungi dunyoning asosiy muammolaridan biri — bozorlar topish. Har bir mamlakat o‘z mahsulotini chet elda ommalashtirish uchun harakat qiladi”, — ta’kidladi Shavkat Mirziyoyev.
U shu kabi yirik markazlar mamlakatning boshqa viloyatlaridagi chegara mintaqalarida qurilishi lozimligini qo‘shimcha tarzda aytib o‘tdi.
Safar davomida Shavkat Mirziyoyev O‘zbekistonning janubiy sarhadlaridagi chegara postlaridan birini ko‘zdan kechirdi.
Izoh (0)