Режиссёрликда дебют қилган актёр ва тақлидчи Шерзод Бин, журналист Феруз Муҳаммад билан суҳбати давомида, ўзбек киносининг ҳозирги аҳволи, кинотеатрларга томошабин ташрифи камайиб кетгани сабаблари ҳақида фикр билдирди.
«Кинода нопрофессионаллар кўпайиб кетгани сабаб ҳақиқий кино оладиганлар кам қолган. Бугунги кунда кино соҳаси жуда ҳам аянчли аҳволда, бунда ўзимизнинг ҳам айбимиз бор — буни ҳам тан оламан. Ҳозирда профессионал режиссёрларимиз ҳам яхшилаб ўйлаб, сўнг фильм олиш йўлига ўтган», — деди Шерзод Бин.
«Фильмлар сифати пасайиб кетганидан сўнг, кинотеатрларга келадиган томошабин сони ҳам камайиб бормоқда. Касби бошқа бўлса-да, қўлида пули бор, кинога фақат тирикчилик кўзи билан қарайдиган инсонлар кўпайиб кетди. Мен кимнидир танқид қилиб, ўзимдан профессионал ясамоқчи эмасман — кинони бизга ўхшаган нопрофессионал одамлар синдирди, десам ҳам хато бўлмайди», — деди актёр.
«Тўғри, мен институтда ўқиганман, аммо биз ҳам баъзида улар каби енгил ёндошишимизга тўғри келди. Аммо пул топиш учун кинога бундай енгил, саёз ёндашиш керак эмас, бу гап нафақат бошқаларга, балки ўзимга ҳам қаратилган деб ҳисоблайман», — деди Шерзод Бин.
«Санъат олийгоҳидаги устозимиз Шоира Ҳамидова: ‘Сен ишингни шу даражада мукаммал қилгинки, шунинг ўзи сенга битмас-туганмас давлат олиб келади’, дер эди. Ҳақиқатан ҳам, мен пародия билан шуғулланганимда бу ишни пул учун эмас, балки ўзим шу ишдан мазза қилганим, завқ олганим учун қилганман. Иштиёқ билан, чин дилдан ишлаган эканманки, шу ишим, яъни, пародияларим туфайли ўзим хаёл ҳам қилмаган, кутмаган миқёсдаги бойлик ҳам машҳурликка эришдим», — дея қўшимча қилди Шерзод Бин.
Эслатиб ўтамиз, 23 сентябрь куни Шерзод Биннинг биринчи режиссёрлик иши — «Қайсар ошиқлар» фильми премьераси бўлиб ўтган эди.Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)