Aktyor Sherzod Bin: Suratga olgan filmim professional emas, biroq unda tomoshabinga aytmoqchi bo‘lgan gaplarim bor
Aktyor va taqlidchi Sherzod Bin o‘zini rejissorlikda sinab ko‘rib, “Qaysar oshiqlar” nomli film suratga oldi. Kartina premyerasi 23-sentabr kuni bo‘lib o‘tgani haqida avval xabar berilgan edi. Jurnalist Feruz Muhammad Sherzod Bilan uning yangi ijodiy tajribasi haqida suhbatlashdi.
— Savolimni to‘g‘ri qabul qilasiz, degan umiddaman. Bugun kinoda havaskor rejissorlar, ularning ba’zan tanqidga ham arzimaydigan filmlari ko‘payib ketdi. Sizni mahoratli aktyor sifatida bilamiz, biroq rejissura — umuman boshqa olam. Bu borada bilim, tajribam yetarli, deb hisoblaysizmi?— Institutda Estrada aktyorligi fakultetida tahsil olganman. Bu fakultetda juda ko‘p sohalar, xususan, dramaturgiya, rejissura, pantomimo kabilar bo‘yicha mukammal bilim beriladi. Rejissurani amaliyotda, filmlarni tasvirga olish jarayonida rejissorlardan o‘rganganman.
— “O‘zbekkino”dagi Badiiy kengashdan filmlarning o‘tishi qiyinlashib ketgan, Kengash tomonidan filmlarga qo‘yilayotgan talablar qat’iylashgan. Mazkur jarayonda qiyinchiliklar bo‘lmadimi?— Filmimiz Badiiy kengashdan o‘tdi. Premyeradan uch oycha avval ruxsat olingan edi. Asal Shodiyeva, Jahongir To‘lqinov, Elyor Nosirov, Ra’no Yarasheva, Muhammadiso Abdulxairov, Lola Eltoyeva kabi aktyor-aktrisalar suratga tushgan filmimizning ishchi nomi “Uchrashguncha” edi, ko‘plab muxlislarimiz ham kartinani shu nom bilan bilishadi. Premyera arafasida uning nomi “Qaysar oshiqlar” deb o‘zgartirildi. “Qaysar oshiqlar”ni professional darajadagi film deya olmayman, biroq bu ishim orqali tomoshabinlarga aytadigan gaplarim ko‘p.
— Adashmasam, 2016 yilning ikkinchi yarmida premyerasi bo‘lib o‘tgan birorta filmda ko‘rinmadingiz. Buning sababi nima: rolga taklif yo‘qmi yoki takliflarni rad etyapsizmi?— Buning sababi, avvalo, taqdirdan deb o‘ylayman. Ochig‘i, 2016-yilda birorta filmga taklif qilishmadi. 2015-yil oxirida davlat buyurtmasiga asosan suratga olinadigan filmlardan biriga, bosh rolga taklif qilishgan edi, ammo sayohat sabab taklifni rad etgandim. So‘nggi vaqtlarda faqat kliplarga taklif bo‘lmoqda — 2016-yil boshidan beri, yanglishmasam, 6—7 klipda suratga tushdim. Bundan tashqari, shu yil birinchi bor o‘zim ham ssenariysini yozib, ham rejissorlik qilgan klipim muxlislar e’tiboriga havola qilindi. Mazkur klip Oybek va Nigoraning “Oppog‘oy” deb nomlangan qo‘shig‘iga ishlangan edi. Bu klipdan so‘ng juda ham ko‘p xonandalardan takliflar tushmoqda. Bugungi kunda asosan kliplar bilan bandman.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
